Каталониянинг «Барселона» клуби коронавирус пандемияси оқибатлари туфайли 100 миллион евро зарар кўриши мумкин.
Mundo Deportivo хабарига кўра, жорий молиявий йил учун «Барселона»нинг бюджети 1 миллиард 47 миллион еврони ташкил этган. Коронавирус пандемияси бошланишидан олдин эса каталон клубининг 1,1 миллиард евро миқдорида даромад кўриши кутилаётганди.
Бироқ пандемия туфайли «Барселона»нинг даромади кескин пасайиб кетди: дўконлар, музейлар ёпилди, стадион бўйлаб саёҳатлар тўхтатилди. Аммо клубга энг катта зарар келтирган жиҳат – жамоанинг бўш трибуналарда 6 та уй учрашувини ўтказгани бўлди.
Карантин вақтида футболчиларнинг ойлик маошининг 12 фоизга камайиши зарарларни қоплашга оз бўлса-да ёрдам берди. Шу билан бирга «Барселона» Артурни «Ювентус»га 80 миллион еврога сотди ва Неймарнинг трансфери билан боғлиқ суд ишида ғолиб чиқди. Буларнинг барчаси «Барселона»га зарарларни 100 миллион еврогача камайтириш имконини беради.
Эслатиб ўтамиз, аввалроқ «Барселона» раҳбарияти 200 миллион евро фойда олишни режалаштираётгани тўғрисида хабарлар тарқалганди.
36-турдан кейин «Барселона» 79 очко билан 2-ўринда бормоқда. Жамоа 1-поғонадаги «Реал»дан 4 очкога ортда қолмоқда.
Мавзуга доир:
Изоҳ (0)