11-iyul kuni O‘zbekiston xalq hofizi Mahmudjon Tojiboyev 63 yoshida vafot etdi. Bu haqda O‘zbekiston madaniyat vaziri Ozodbek Nazarbekov ma’lum qildi.
O‘zbekiston milliy qo‘shiqchilik, maqom san’ati yo‘nalishidagi barakali ijodi, nozik didi, dardli, keng diapazonli ovozi, betakror ijro mahorati bilan hamkasblari, shogirdlari, muxlislari mehri, e’tiborini qozongan O‘zbekiston xalq hofizi, “Mehnat shuhrati” ordeni sohibi, ustoz san’atkor Mahmudjon G‘oziyevich Tojiboyev to‘satdan, yurak xurujidan vafot etdi.Ma’lumot uchun, Mahmudjon Tojiboyev 1957-yil 25-noyabrda Quva tumanida tug‘ilgan. Maqom ijrochiligi bo‘yicha O‘zbekiston davlat konservatoriyasida tahsil olgan.So‘nggi yillardagi milliy musiqa, milliy qo‘shiqchilik, maqom san’ati rivoji yo‘lidagi islohotlardan, yaratilayotgan imkoniyat va sharoitlardan ruhlanib, yanada kuch-g‘ayrat bilan ishlashga astoydil kirishgan, o‘z kasbining haqiqiy jonkuyari, fidoyisi bo‘lgan tolmas ijodkorning bevaqt o‘limi barchamizni chuqur qayg‘uga soldi.
Kechagina turli tadbirlarga bo‘layotgan tayyorgarlik jarayonlarida faol qatnashayotgan, shogirdlariga jonkuyarlik bilan maqom sirlarini o‘rgatayotgan ustozimiz bugun oramizda yo‘q!
Hofizlik an’analarini Orif Alimaxsumov, Fattohxon Mamadaliyev, O.Otaxonov, G‘.Hojiqulov, sozandalik sirlarini T.Alimatov kabi mumtoz qo‘shiqchilik san’ati darg‘alaridan qunt bilan o‘zlashtirgan, o‘ziga ham, shogirdlariga ham talabchan bo‘lgan ustozimiz, milliy musiqa va qo‘shiqchilik san’atimizni Osiyo, Amerika, Yevropa, Afrika mamlakatlarida namoyish etib kelgan, Yunus Rajabiy nomidagi Respublika maqom ijrochilari tanlovi g‘olibi, so‘nggi nafasigacha san’atimiz rivoji uchun fidokorona mehnat qilgan ustoz san’atkorning yorqin xotirasi qalblarimizda mangu saqlanadi, haqiqiy san’at jonkuyarlari yuragida yashaydi.
O‘zbekiston davlat konservatoriyasidagi uzoq yillik zahmatli mehnatlari, izlanish, intilishlari natijasida yetishib chiqqan shogirdlari ustozlarining ezgu ishlarini davom ettirishlari shubhasiz.Haqiqiy san’at fidoyisi Mahmudjon Tojiboyevning vafoti munosabati bilan marhumning oila a’zolari va yaqinlariga chuqur hamdardlik bildiramiz.
Ozodbek Nazarbekov, O‘zbekiston madaniyat vaziri
Repertuaridan Shashmaqom (“Saraxbori Navo”, “Saraxbori Dugoh”, “Mo‘g‘ulchai Segoh”, “Navro‘zi Sabo”, “Nimcho‘poniy” va b.) va Farg‘ona—Toshkent maqom yo‘llari (“Dugoh”, “Chorgoh”, “Ushshoq”, “Shahnozi Gulyor”, “Bayot” va b.), katta ashula (“Yovvoyi Chorgoh”, “Yolg‘iz”, “Ey dilbari jononim” kabi), mumtoz (“Topmadim”, “Asiriy” va “Ldoiy”, “Chorzarb”, “Bozurgoniy”) va XX asr bastakorlari (“Keldik”, “Nazzora qil”, K. Jabborov; “Kezarman”, F.Toshmatov; “Jonim erursan”, M. Murtazoyev; “Dilrabolar”, O. Nuriddinov; “Bu oqshom”, O. Hotamov va b.) asarlari o‘rin olgan.
Izoh (0)