11 июль куни Ўзбекистон халқ ҳофизи Маҳмуджон Тожибоев 63 ёшида вафот этди. Бу ҳақда Ўзбекистон маданият вазири Озодбек Назарбеков маълум қилди.
Ўзбекистон миллий қўшиқчилик, мақом санъати йўналишидаги баракали ижоди, нозик диди, дардли, кенг диапазонли овози, бетакрор ижро маҳорати билан ҳамкасблари, шогирдлари, мухлислари меҳри, эътиборини қозонган Ўзбекистон халқ ҳофизи, «Меҳнат шуҳрати» ордени соҳиби, устоз санъаткор Маҳмуджон Ғозиевич Тожибоев тўсатдан, юрак хуружидан вафот этди.Маълумот учун, Маҳмуджон Тожибоев 1957 йил 25 ноябрда Қува туманида туғилган. Мақом ижрочилиги бўйича Ўзбекистон давлат консерваториясида таҳсил олган.Сўнгги йиллардаги миллий мусиқа, миллий қўшиқчилик, мақом санъати ривожи йўлидаги ислоҳотлардан, яратилаётган имконият ва шароитлардан руҳланиб, янада куч-ғайрат билан ишлашга астойдил киришган, ўз касбининг ҳақиқий жонкуяри, фидойиси бўлган толмас ижодкорнинг бевақт ўлими барчамизни чуқур қайғуга солди.
Кечагина турли тадбирларга бўлаётган тайёргарлик жараёнларида фаол қатнашаётган, шогирдларига жонкуярлик билан мақом сирларини ўргатаётган устозимиз бугун орамизда йўқ!
Ҳофизлик анъаналарини Ориф Алимахсумов, Фаттоҳхон Мамадалиев, О.Отахонов, Ғ.Ҳожиқулов, созандалик сирларини Т.Алиматов каби мумтоз қўшиқчилик санъати дарғаларидан қунт билан ўзлаштирган, ўзига ҳам, шогирдларига ҳам талабчан бўлган устозимиз, миллий мусиқа ва қўшиқчилик санъатимизни Осиё, Америка, Европа, Африка мамлакатларида намойиш этиб келган, Юнус Ражабий номидаги Республика мақом ижрочилари танлови ғолиби, сўнгги нафасигача санъатимиз ривожи учун фидокорона меҳнат қилган устоз санъаткорнинг ёрқин хотираси қалбларимизда мангу сақланади, ҳақиқий санъат жонкуярлари юрагида яшайди.
Ўзбекистон давлат консерваториясидаги узоқ йиллик заҳматли меҳнатлари, изланиш, интилишлари натижасида етишиб чиққан шогирдлари устозларининг эзгу ишларини давом эттиришлари шубҳасиз.Ҳақиқий санъат фидойиси Маҳмуджон Тожибоевнинг вафоти муносабати билан марҳумнинг оила аъзолари ва яқинларига чуқур ҳамдардлик билдирамиз.
Озодбек Назарбеков, Ўзбекистон маданият вазири
Рэпертуаридан Шашмақом («Сарахбори Наво», «Сарахбори Дугоҳ», «Мўғулчаи Сегоҳ», «Наврўзи Сабо», «Нимчўпоний» ва б.) ва Фарғона—Тошкент мақом йўллари («Дугоҳ», «Чоргоҳ», «Ушшоқ», «Шаҳнози Гулёр», «Баёт» ва б.), катта ашула («Ёввойи Чоргоҳ», «Ёлғиз», «Эй дилбари жононим» каби), мумтоз («Топмадим», «Асирий» ва «Лдоий», «Чорзарб», «Бозургоний») ва ХХ аср бастакорлари («Келдик», «Наззора қил», К. Жабборов; «Кезарман», Ф.Тошматов; «Жоним эрурсан», М. Муртазоев; «Дилраболар», О. Нуриддинов; «Бу оқшом», О. Ҳотамов ва б.) асарлари ўрин олган.
Изоҳ (0)