«Агробанк»нинг Миришкор туман филиали ходимлари ҳамда банк мижозлари, шунингдек, Миллий гвардия ходимлари ҳам банк биносида карантинга олинган. Бу ҳақда хабар берган манбанинг ёзишича, банкка коронавирусга чалинган бемор келиб-кетган.
Хабар берилишича, Миришкор туман Санитария-эпидемиологик осойишталик маркази ходимлари банк биносида карантинга олинганлардан COVID-19 учун тест олган.
Таъкидланишича, айни кунда банк биносида карантинга олинганларнинг соғлиғи яхши ва доимий кузатувда.
«Дарё» мухбирининг аниқлаштиришича, банк биноси 10 июль, жума куни карантинга ёпилган бўлиб, ичкарида 19 нафар банк ходими, 3 нафар фуқаро, 2 нафар инкассатор ва 4 нафар Миллий гвардия ходими бор. Банк ёпилиши ортидан 11 июль, шанба куни туман марказига кириб-чиқиш ҳам тўхтатилган.
Туман марказига кириб-чиқиш тўхтатилганини тасдиқлаган туман ҳокимлиги ахборот хизмати раҳбари Азизбек Яздурдиев чеклов карантин сабабли эканлигини айтди.
Маълумот берилишича, айни кунда туманда беш нафар фуқаро коронавирус юқтирганликда гумонланмоқда. Гумондорларнинг 28 нафар оила-аъзоси ҳам карантинга олинган.
«Миришкор туманида яшовчи фуқарода Ғузор туманидаги Uzbekistan GTL заводида ишлаётган вақтида коронавирус аниқланган бўлиб, бемор ҳозирги вақтда Ғузорда даволанмоқда», — деб ёзади «Помуқ24».
Эслатиб ўтамиз, Қашқадарё вилояти махсус комиссияси 2020 йилнинг 3 июль куни вилоятдаги вазиятни ошкор қилганди. Шундан сўнг вилоятнинг Ғузор тумани ва 17 та маҳалласи «қизил» ҳудуд мақомини олди. Бироз вақт ўтиб вилоятда коронавирусдан касалланганлар кўрсаткичи юқорилагач, вилоят соғлиқни сақлаш бошқармаси 127 нафар бемор Uzbekistan GTL заводи қурилишидаги қурувчилар эканлигини таъкидлади. Қашқадарё ҳокими эса оилавий тадбирда иштирок этган ҳамда депутатлар билан учрашган шифокор 30 нафар фуқарога коронавирус юқтирганини очиқлаганди.
Изоҳ (0)