Koreyalik mutaxassis 6 oyga Shuhrat G‘aniyevning iqtisod va investitsiya masalalari bo‘yicha maslahatchisi etib tayinlandi

Farg‘ona viloyati hokimi Shuhrat G‘aniyev 6—8-iyul kunlari Janubiy Koreyaga xizmat safarini amalga oshirdi. Bu haqda Farg‘ona viloyati hokimligining axborot xizmati xabar qilgan.

Xabarda qayd etilishicha, tashrif davomida savdo-iqtisodiy aloqalarni yanada kengaytirish, eksport hajmini oshirish, investitsion hamkorlikni rivojlantirish, hududlar o‘rtasidagi tovar aylanmasini kelgusida ikki baravarga ko‘paytirish bo‘yicha muzokaralar olib borildi.

Xizmat safari yakunlari bo‘yicha Farg‘ona viloyati hokimligi va Janubiy Koreyaning yirik kompaniyalari o‘rtasida 285 million AQSh dollarlik 7 ta kelishuv imzolangan. Jumladan,

Farg‘ona viloyatida tashkil etilgan Koreyaning KIUF xalqaro universiteti faoliyatini yanada kengaytirish, ta’lim sifatini oshirish maqsadida qo‘shimcha 25 nafar malakali professorlar jalb qilinadi;

Kreves crops Co.LTD korxonasi bilan moyli o‘simliklarni yetishtirish va o‘simlik moyi ishlab chiqarish tashkil etiladi;

GNT Co.LTD korxonasi bilan hamkorlikda viloyatning Bag‘dod tumanida qandli diabet kasalligi (glyukometr) hamda qon bosimini o‘lchovchi uskunalar ishlab chiqarish yo‘lga qo‘yiladi;

Jinwon Trading Co.LTD kompaniyasi bilan Farg‘ona viloyatida yetishtirilgan meva mahsulotlarini Koreyaga eksport qilish bo‘yicha shartnoma tuzilgan;

KANAAN kompaniyasi tomonidan Farg‘ona viloyatining Beshariq, Bag‘dod hamda Farg‘ona tumanlarida tayyor trikotaj mahsulotlarini ishlab chiqarish korxonalari tashkil qilinadi;

Hyundai Engineering kompaniyasi bilan Farg‘ona viloyatining Quvasoy shahrida joylashgan issiqlik energiya markazi modernizatsiya qilinadi;

Shuningdek, Koreya hududiy issiqlik ta’minoti korporatsiyasi (KDHC) direktorining o‘rinbosari Benjamin Yun olti oy muddatga Farg‘ona viloyati hokimi Shuhrat G‘aniyevning iqtisod va investitsiya masalalari bo‘yicha maslahatchisi sifatida jalb qilingan.