“Insider.uz” nashri 2020-yilning 22-yanvarida Farg‘ona viloyat IIBga boshliq etib tayinlangan Doniyor Toshxo‘jayev bilan intervyu uyushtirib, bir qator savollarga javob oldi.
Ish yuklamasi ko‘pligi, vaqti tig‘izligiga qaramasdan Doniyor Toshxo‘jayev jurnalistlar bilan uchrashish uchun fursat ajratgan va Farg‘ona IIBga boshliq etib tayinlangani “surgun” sifatida talqin etilayotgani to‘g‘risidagi gap-so‘zlarga oydinlik kiritgan.
“Yo‘q, bu surgun emas. Kadrlar rotatsiyasi. Meni qayerga jo‘natishmasin, oddiy tergovchi sifatida bo‘lsa ham ishlab beraman. Farg‘onaga kelganimda bu naqadar zamonaviy shahar ekanligini ko‘rganimdan so‘ng taajjublangan va quvongan edim. Odamlari ham o‘qimishli, aqlli, ishchan, xushmuomala, hattoki bolalarini ham ‘siz’lashar ekan. Men bu shaharga bolalagimda otam bilan kelgan edim, endi o‘zim uchun Farg‘onani qayta kashf etdim. Biz bu yerga Toshkentdan ko‘plab g‘oyalarni olib kelganmiz, avgust oyida 102 raqamiga qo‘ng‘iroq qilinganida inson omili nolga teng bo‘lgan, javob berish mobil tarzda, xodimlar real vaqt rejimida qayerdan qo‘ng‘iroq bo‘layotgani-yu, kim o‘sha joyga eng yaqin bo‘lsa yetib boruvchi tizimni taqdim etamiz. Bu haqda uni ishga tushirganimizdan so‘ng batafsil gaplashamiz”, — deydi Toshxo‘jayev.
Ta’kidlanishicha, jinoyatchilik darajasi esa chindan ham oshgan. Yangi boshliq va uning jamoasi eng kichik jinoyat, hattoki mobil telefon o‘g‘irlanishi ham qayd etilishi prinsipi bilan ish ko‘rmoqda: “Kimlardir uchun bu katta ko‘ngilsizlik bo‘ldi. Biz garchi statistika oqsay boshlasa ham har qanday signal qayd etilishiga erishdik. Eng asosiysi — odamlar ularni katta va kichik muammolari e’tiborsiz qolmasligini bilishadi.
Shuningdek, Doniyor Toshxo‘jayev o‘zining to‘ng‘ich qizi tergovchi bo‘lishga ahd qilib, yuridik fakultetga o‘qishga kirgani, uni bu fikrdan qaytara olmagani, viloyat IIB boshlig‘ining moliyaviy masalalar bo‘yicha o‘rinbosari lavozimiga xodim ayollardan birini tayinlashga ko‘ndira olmaganini so‘zlab bergan. Bundan tashqari, Farg‘ona viloyati IIB boshlig‘i viloyat hokimi Shuhrat G‘aniyev haqida fikrlari bilan ham o‘rtoqlashgan.
“O‘tkir xotiraga ega, ko‘p o‘qigan, bilimli, aqlli, tarixni biladi va nafaqat O‘zbekiston tarixini. Rus tilini juda yaxshi biladi, savodli rahbar, nihoyatda ishchan”, — deydi Toshxo‘jayev. Shu bilan birga, u G‘aniyevning so‘kong‘ichligi haqida ham to‘xtalib o‘tgan:
“Bu fikr qanday paydo bo‘lyapti, bilmadim. Hokim bemalol gapirgan chog‘da hech kim uning ovozini telefoniga yozib olmaganidan bo‘lsa kerak. U jahllanib, o‘zidan chiqqan paytdagisi qiziq, internet uchun material bor. Men o‘zim ko‘rganimni aytyapman. Men ham boshida bu odam bilan ishlash qiyin bo‘ladi, deb o‘ylagandim. Xato qilgan ekanman. Men bu yerga kelganimda bir fakt meni juda hayron qoldirgan — viloyatdagi juda ko‘p insonlarda uning qo‘l telefoni raqami bor, aftidan, odamlar bir-birlariga tarqatib yuborishgan. Odamlar unga to‘g‘ridan to‘g‘ri qo‘ng‘iroq qilishadi, hokim ularni eshitadi, qandaydir muammosini hal qiladi”.
Ma’lumot uchun, Doniyor Toshxo‘jayev yangi lavozimga tayinlangunga qadar 2019-yilning iyunidan buyon Tergov departamenti boshlig‘i lavozimida ishlab kelayotgan edi. Undan avval 2019-yil yanvaridan beri Toshkent shahar IIBB boshlig‘i o‘rinbosari — Kadrlar boshqarmasi boshlig‘i, avvalroq esa IIBB boshlig‘i o‘rinbosari — Tergov boshqarmasi boshlig‘i lavozimlarida faoliyat yuritgan.
Izoh (0)