“Qo‘qon-1912” klubi bosh murabbiyi Baxtiyor Ashurmatov Coca-Cola Superliga 8-turi doirasida OKMKga qarshi kechgan o‘yindan (2:1) so‘ng o‘z fikrlari bilan o‘rtoqlashdi.

“Kayfiyatim yaxshi emas. Chunki birinchi bo‘limni yomon o‘tkazmadik. Ikkinchisini ham unchalik yomon boshlamagandik. Lekin Sanjar Tursunov ushbu mavsumni bezaydigan gol muallifiga aylandi va bu gol o‘yin taqdirini hal qildi deb o‘ylayman. Oxirigacha kurashishgani uchun yigitlarga ham minnatdorlik bildiraman. Hech bo‘lmasa durang uchun o‘ynashdi, afsuski, bizdan omad yuz o‘girdi.

Biz ahil jamoa tuza oldik. O‘yindan oldin kiyinish xonasida yigitlarga uydagi g‘alabalar bilan yuqori marralarga erishish qiyinligini aytgandim. To‘g‘ri, hozirda musobaqa jadvalida yuqori o‘rinlardamiz, lekin bizning asosiy raqobatchimiz bo‘lgan OKMKga mag‘lub bo‘ldik. Agarda chempionatda yuqori pog‘onalar uchun kurashmoqchi bo‘lsak, shunday o‘yinlarda yutishimiz kerak bo‘ladi. Mazkur uchrashuvda yomon o‘ynamadik. Yaxshi o‘yin bilan bir qatorda natijani ham yaxshilab ketishimiz kerak. Shu orqali biz mavsum yakunida yuqori o‘rinlarda bo‘lamiz.

Umuman olganda yigitlarning ruhiyatini o‘zgartirishga muvaffaq bo‘ldik. So‘nggi yillarda “Qo‘qon-1912” jamoasi, afsuski, Superligadan tushib ketmaslik maqsadida kurashayotgandi. Futbolchilarda ishonch yuqoriligi bois, O‘zbekistonning eng kuchli jamoalaridan biri, tarkibi ham, zaxirasi ham kuchli yuqori saviyali futbolchilardan tashkil topgan OKMKga 0:2 hisobida imkoniyatni boy berayotgan paytda ham sinib qolmadik. Mavsum yakunida yuqori o‘rinlarda bo‘lishni juda ham istaymiz. Buning uchun hozirgi olgan startimizni saqlab qolishimiz kerak bo‘ladi. Mehmondagi o‘yinlarda ham nafaqat durang, balki g‘alaba uchun ham kurashishimiz lozim.

Jamoaning maqsadi? Rahbariyat bilan gaplashganimizda avvaliga o‘tgan yillar davomida bo‘layotgan muvaffaqiyatsizliklarni yengib o‘tib, tarkibni bosqichma-bosqich shakllantirib borish va keyinchalik yuqori o‘rinlar uchun kurashishimizni aytishgandi. So‘ngra Osiyo Chempionlar Ligasi yo‘llanmasi uchun raqobatbardosh jamoa tuzmoqchimiz. Jamoada raqobatni oshirish uchun shunga yarasha kuchli futbolchilar bo‘lishi kerak va shu boisdan bosqichma-bosqich bunga erisha olamiz.

Jamoani qabul qilib olganimda menga 3-o‘rinni olish yoki Chempionlar Ligasiga chiqish kabi aniq vazifa qo‘yilmagan. Asosiysi shundaki, biz “Qo‘qon-1912”ni yuqori o‘rinlar uchun kurasha oladigan raqobatbardosh jamoa qilishni kelishib olgandik. Balki bunga erishayotgandirmiz. To‘g‘ri, endi 8 tur o‘tdi. Ammo ko‘rinib turibdiki, jamoamiz quyi o‘rinlar uchun kurashmaydi. Hozir birinchi davra tugab, transferlar oynasi ochilishini kutyapman. Chunki hozirda ayrim kamchiliklarimiz bor. Shularni to‘ldirib, raqobatni kuchaytirib, musobaqa jadvalida yuqori pog‘onalarda bo‘lish uchun kurashishni istaymiz. Futbolchilarimning salohiyati, mahorati bilan biz ushbu mavsumning o‘zidayoq tepadagi o‘rinlardan birini egallamoqchimiz”, — deya Ashurmatovdan iqtibos keltirmoqda “Championat.asia”.

“Qo‘qon-1912” 8-turga kelib 15 ochko to‘plagan holda 4-pog‘onani egallab turibdi.

Mavzuga doir: