Бахтиёр Ашурматов ОКМКдан қабул қилинган мағлубият ҳақида: Кайфиятим яхши эмас

«Қўқон-1912» клуби бош мураббийи Бахтиёр Ашурматов Coca-Cola Суперлига 8-тури доирасида ОКМКга қарши кечган ўйиндан (2:1) сўнг ўз фикрлари билан ўртоқлашди.

«Кайфиятим яхши эмас. Чунки биринчи бўлимни ёмон ўтказмадик. Иккинчисини ҳам унчалик ёмон бошламагандик. Лекин Санжар Турсунов ушбу мавсумни безайдиган гол муаллифига айланди ва бу гол ўйин тақдирини ҳал қилди деб ўйлайман. Охиригача курашишгани учун йигитларга ҳам миннатдорлик билдираман. Ҳеч бўлмаса дуранг учун ўйнашди, афсуски, биздан омад юз ўгирди.

Биз аҳил жамоа туза олдик. Ўйиндан олдин кийиниш хонасида йигитларга уйдаги ғалабалар билан юқори марраларга эришиш қийинлигини айтгандим. Тўғри, ҳозирда мусобақа жадвалида юқори ўринлардамиз, лекин бизнинг асосий рақобатчимиз бўлган ОКМКга мағлуб бўлдик. Агарда чемпионатда юқори поғоналар учун курашмоқчи бўлсак, шундай ўйинларда ютишимиз керак бўлади. Мазкур учрашувда ёмон ўйнамадик. Яхши ўйин билан бир қаторда натижани ҳам яхшилаб кетишимиз керак. Шу орқали биз мавсум якунида юқори ўринларда бўламиз.

Умуман олганда йигитларнинг руҳиятини ўзгартиришга муваффақ бўлдик. Сўнгги йилларда «Қўқон-1912» жамоаси, афсуски, Суперлигадан тушиб кетмаслик мақсадида курашаётганди. Футболчиларда ишонч юқорилиги боис, Ўзбекистоннинг энг кучли жамоаларидан бири, таркиби ҳам, захираси ҳам кучли юқори савияли футболчилардан ташкил топган ОКМКга 0:2 ҳисобида имкониятни бой бераётган пайтда ҳам синиб қолмадик. Мавсум якунида юқори ўринларда бўлишни жуда ҳам истаймиз. Бунинг учун ҳозирги олган стартимизни сақлаб қолишимиз керак бўлади. Меҳмондаги ўйинларда ҳам нафақат дуранг, балки ғалаба учун ҳам курашишимиз лозим.

Жамоанинг мақсади? Раҳбарият билан гаплашганимизда аввалига ўтган йиллар давомида бўлаётган муваффақиятсизликларни енгиб ўтиб, таркибни босқичма-босқич шакллантириб бориш ва кейинчалик юқори ўринлар учун курашишимизни айтишганди. Сўнгра Осиё Чемпионлар Лигаси йўлланмаси учун рақобатбардош жамоа тузмоқчимиз. Жамоада рақобатни ошириш учун шунга яраша кучли футболчилар бўлиши керак ва шу боисдан босқичма-босқич бунга эриша оламиз.

Жамоани қабул қилиб олганимда менга 3-ўринни олиш ёки Чемпионлар Лигасига чиқиш каби аниқ вазифа қўйилмаган. Асосийси шундаки, биз «Қўқон-1912»ни юқори ўринлар учун кураша оладиган рақобатбардош жамоа қилишни келишиб олгандик. Балки бунга эришаётгандирмиз. Тўғри, энди 8 тур ўтди. Аммо кўриниб турибдики, жамоамиз қуйи ўринлар учун курашмайди. Ҳозир биринчи давра тугаб, трансферлар ойнаси очилишини кутяпман. Чунки ҳозирда айрим камчиликларимиз бор. Шуларни тўлдириб, рақобатни кучайтириб, мусобақа жадвалида юқори поғоналарда бўлиш учун курашишни истаймиз. Футболчиларимнинг салоҳияти, маҳорати билан биз ушбу мавсумнинг ўзидаёқ тепадаги ўринлардан бирини эгалламоқчимиз», — дея Ашурматовдан иқтибос келтирмоқда «Championat.asia».

«Қўқон-1912» 8-турга келиб 15 очко тўплаган ҳолда 4-поғонани эгаллаб турибди.

Мавзуга доир: