AQSh hukumati mamlakatda tartibsizliklarni yuzaga keltirayotgan radikallar ustidan g‘alaba qozonishni va’da qilmoqda. Bu haqda prezident Donald Tramp Oq uyda AQSh mustaqilligi kuni munosabati bilan o‘tkazilgan tadbirda aytib o‘tgan.
“Biz qahrga to‘la olomonning haykallarimizni oyoqosti qilishiga, tarixning ustidan kulishiga, bolalarimizning ongiga salbiy ta’sir ko‘rsatib, ozodlikka tahdid qiluvchilarning ushbu harakatlariga qarab tura olmaymiz”, — deya Trampning so‘zlarini keltirgan The New York Times.
AQSh yetakchisining so‘zlariga ko‘ra norozilik bildirayotganlar adolat qaror topishidan manfaatdor emas.
Tramp o‘z nutqi davomida millatchilarni yenggan Amerika qahramonlarini eslab o‘tgan: uning qayd etishicha ular fashistlar va kommunistlarni mag‘lub etgan, Amerika manfaatlarini himoya qilgan, shuningdek, yerning bir burchagiga qochib ketgan qochoqlarni oxirigacha ta’qib qilgan (The Hill nashri keltirgan iqtibos).
Trampning ta’kidlashicha AQSh so‘l radikallar, marksistlar, anarxistlar, targ‘ibotchilar, marodyorlarning va “nima qilayotgani haqida umuman tushunchasi yo‘q odamlarni” tor-mor qilishga yaqin turibdi.
Avval Donald Tramp Janubiy Dakota shtatidagi Rashmor tog‘idagi xotira maydonida nutq so‘zlab AQSh milliy qahramonlar hamda tarixni vayron qilishga qaratilgan shafqatsiz kampaniya guvohiga aylanganini qayd etgandi. Prezidentning aytishicha “so‘l fashizmi” tarafdorlari ushbu yo‘l orqali “Amerika revolyutsiyasini” boshlab AQShdagi tuzumni o‘zgartirishga urinmoqda.
May oyi oxirida AQShda va keyinroq boshqa mamlakatlarda Black Lives Matter (“Qora tanlilarning hayoti ahamiyatga ega”) shiori ostidagi norozilik namoyishlari boshlangan. Ushbu tartibsizliklarga Minneapolisda afroamerikalik Jorj Floydning politsiyachilar tomonidan qiynoqqa solinishi va kasalxonada vafot etishi sabab bo‘lgan. Noroziliklar ko‘plab shaharlarda zo‘ravonlik harakatlari, o‘g‘riliklar, to‘qnashuvlar sodir bo‘lishiga olib keldi, ishtirokchilar quldorlik va rasizmga aloqadorligi gumon qilingan tarixiy shaxslarning haykallari vandallar hujumiga uchradi. Xususan, turli shtatlarda Xristofor Kolumbning bir nechta haykali “boshsiz” qoldirildi.
Shundan keyin Tramp haykallarga nisbatan har qanday vandalizm harakatlarini amalga oshirgan fuqarolarni hibsga olishga ruxsat berdi. Shuningdek, vandallarni uzoq muddatga qamash ko‘zda tutilgan farmonni imzolagan.
Izoh (0)