Инсон ҳуқуқлари бўйича миллий марказ Олий суди ва Бош прокуратурадан Андижондаги ҳолат бўйича суд иши очиқ ўтказилишини қатъий талаб қилди

Инсон ҳуқуқлари бўйича миллий маркази бўлим бошлиғи Ойбек Аҳматов масъуллардан Халқаро пресс-клубнинг навбатдаги сессиясида Андижонда фуқаронинг ички ишлар ходимлари томонидан қийноқларга солиниши бўйича жиноят ишини очиқ ўтказилишини қатъий талаб қилди. Бу ҳақда «Дарё» мухбири Мусулмонбек Иброҳимов хабар бермоқда.

Ойбек Аҳматовнинг маълум қилишича, Инсон ҳуқуқлари бўйича миллий марказ Андижонда содир бўлган ҳолатни қатъий назоратга олган. Марказ 12 июндаёқ ушбу ҳолат юзасидан қўзғатилган жиноят иши бўйича олиб борилаётган тергов ҳаракатларини шахсан назоратга олишни сўраб Ўзбекистон Бош прокурори ва ички ишлар вазирига расмий хат билан мурожаат қилган. Бундан ташқари, марказ ходими 18—19 июнь кунлари Андижон вилоятига ташриф буюриб, марҳумнинг оила аъзолари, прокуратура ва ички ишлар бошқармаси ва бошқа ташкилотларда учрашувлар ташкил қилган.

Айбдорлар ҳақли ва муқаррар жазосини олиши шарт. Кеча Ўзбекистон Президенти ушбу фожиали ҳолат бўйича ўз фикрларини билдириб, ишни адолатли ва шаффоф кўриш юзасидан кўрсатмалар берди.

Инсон ҳуқуқлари бўйича миллий марказ адолат тўлиқ қарор топишини инсон ҳуқуқларини поймол қилиш ҳолатларига бутунлай барҳам берилишини ва бундай фожиалар бошқа такрорланмаслиги учун барча имкониятларни ишга солади», — деди марказ вакили.

Эслатиб ўтамиз, Андижон шаҳар ички ишлар органлари ходимлари томонидан фуқаронинг калтаклангани натижасида вафот этиши ортидан Инсон ҳуқуқлари бўйича миллий марказ директори Алмал Саидов Олий Мажлиснинг Инсон ҳуқуқлари бўйича вакили Омбудсманнинг минтақавий вакилига нисбатан танқидий фикрлар билдирганди. Омбудсман ўз навбатида Акмал Саидовнинг танқидига жавоб қайтарганди.

Андижондаги воқеа сабабли фуқаронинг вафот этгани маълум бўлгач, Инсон ҳуқуқлари бўйича миллий марказ фуқаронинг ИИБ томонидан қийноққа солинганини қатъий қоралаганди.