Қашқадарё вилояти Қарши шаҳридаги юк кўтарувчи конструкциялари қулаб тушган Nasaf Travel компаниясига тегишли бинонинг қурилиши ноқонуний олиб борилган. Бу ҳақда Қурилиш вазирлиги маълум қилди.
Вазирлик томонидан таъкидланишича, Қашқадарё вилоят Қурилиш соҳасида ҳудудий назорат инспекцияси томонидан ўрганиш ишлари ўтказилган. Аниқланишича, Nasaf Travel компаниясига тегишли ушбу объектдаги қурилиш ишлари рўйхатга олинмаган ҳолда ноқонуний олиб борилган. Nasaf Travel компанияси инспекцияни қурилиш ишлари ҳақида белгиланган тартибга мувофиқ хабардор этмаган.
«Инспекция томонидан ушбу объект қурилиши бўйича буюртмачи Nasaf Travel компанияси бир неча бор огоҳлантирилган бўлишига қарамасдан, ноқонуний равишда объектда қурилиш-монтаж ишларини давом эттирган. Қурилиш меъёрларининг қўпол равишда бузилиши натижасида мазкур ҳолат келиб чиққан. Тадбиркорлик субъекти қонунда кўрсатилган эркинликларни суиистеъмол қилган. Ноқонуний қурилиш ишларини амалга оширган», — дейилади вазирлик хабарида.
Эслатиб ўтамиз, 23 июнь куни соат 21:30 да Қарши шаҳри Ислом Каримов кўчаси Nasaf Travel меҳмонхонаси биносининг чап томонидан қўшимча қурилаётган 5 қаватли бинонинг юк кўтарувчи темир-бетон конструкциялари қулаб тушган. Бунинг оқибатида бир нафар ишчи-ходим воқеа жойида вафот этган. ФВВ қутқарувчилари вайроналар остидан 4 нафар фуқарони қутқаришга муваффақ бўлган.
Маълумот учун, Тошкент метросидаги «Юнусобод» йўлининг иккита янги бекатини қуриш ишлари чоғида 2019 йилнинг 18 декабрь куни тупроқ ўпирилиб тушиши оқибатида олти нафар ишчи ҳалок бўлганди.
Изоҳ (0)