Ўзбекистонда 2021 йилнинг 1 январидан тадбиркорларга автомобилларни техник кўрикдан ўтказиш хизматини кўрсатишга рухсат берилиши муносабати билан мазкур хизмат турини таклиф қилмоқчи бўлган тадбиркорларга белгиланган талаблар маълум қилинди. Бу ҳақда 24 июнь куни Тошкент шаҳрида тадбиркорлар ва ЙПХ ходимлари билан бирга бўлиб ўтган йиғилишида сўз борди.
Эслатиб ўтамиз, Вазирлар Маҳкамасининг 2017 йил 22 декабрдаги «Транспорт воситаларини мажбурий техник кўрикдан ўтказиш тартибини такомиллаштириш бўйича қўшимча чора-тадбирлар тўғрисида»ги 1010-сонли қарори билан Ички ишлар вазирлиги Давлат йўл ҳаракати хавфсизлиги хизмати бўлинмаларининг жисмоний шахсларга тегишли енгил автотранспорт воситаларини мажбурий техник кўрикдан ўтказиш бўйича функцияларини 2019 йил 1 январдан бошлаб юридик шахслар — тадбиркорлик субъектларига ўтказиш кўзда тутилганди. Бироқ Вазирлар Маҳкамасининг 2019 йил 15 февралдаги 136-сонли қарори билан мазкур муддат 2021 йил 1 январга кўчирилган.
Йиғилишда маълум қилинишича, транспорт воситаларини мажбурий техник кўрикдан ўтказишда амалга оширилаётган ишлар ва хизматларнинг хавфсизлиги ва сифатини таъминлаш мақсадида, транспорт воситаларининг техник ҳолатини текшириш учун мўлжалланган ишлаб чиқариш-техник база жойлаштириладиган хона ва майдонларга доир бир қанча талаблар белгиланган.
Талабларда, техник хизмат кўрсатиш станциялари, тадбиркорлик субъектлари томонидан транспорт воситаларининг техник ҳолатини баҳолаш учун мўлжалланган ишлаб чиқариш-техник база (лабораториялар) жойлаштирилган хона ва майдонларнинг техник нормалари белгиланган. Бунда 16 турдаги зарур техник диагностика воситаларига эга бўлиши лозим.
Ишлаб чиқариш-техник база белгиланган тартибда аккредитациядан ўтказилган, транспорт воситаларининг техник ҳолатини техника жиҳатдан тартибга солиш соҳасидаги норматив ҳужжатлар талабларга мувофиқлигини баҳолашни таклиф этиш ва ўтказиш учун тегишли технологик, синов жиҳозлари ва ўлчаш воситалари билан таъминланган бўлиши керак.
Қайд этилишича, ҳозирча автомобилларни диагностика қилиш станцияларида фақатгина М1 тоифадаги транспорт воситаларини техник кўригини амалга ошириш мумкин.
Изоҳ (0)