Коронавирусдан даволаниш кўрсаткичи энг паст бўлган Қашқадарёда 17 киши касалликдан соғайди

Ўзбекистонда яна 51 киши коронавирусдан соғайди. Тошкент тиббиёт академиясининг кўп тармоқли клиникасида 27 нафар, Тошкент шаҳар 1-сон клиник шифохонасида 2 нафар, Қашқадарё вилоятида 17 нафар, Наманган вилоятида 5 нафар, жами 51 нафар коронавирус инфекциясига чалинган бемор соғайди. Бу ҳақда Соғлиқни сақлаш вазирлиги хабар бермоқда.

Тошкентда тузалганларнинг 25 нафари эркаклар, 4 нафари аёллар бўлиб, уларнинг энг ёши улуғи 56 ёшда ва энг кичиги 19 ёшда. Ҳудудлар кесимида оладиган бўлсак, соғайганларнинг 13 нафари Тошкент шаҳридан, 6 нафари Қорақалпоғистон Республикасидан, 3 нафари Қашқадарё вилоятидан, 2 нафардан Андижон ва Наманган вилоятларидан ва 1 нафардан Тошкент, Фарғона ва Жиззах вилоятларидан.

Шу тариқа айни пайтгача Тошкент шаҳри ва вилоятида коронавирус инфекциясидан 2635 нафар бемор соғайди.

5 июнда коронавирус қайтган Қашқадарё вилоятида 17 киши шифохоналардан тузалиб чиқди. Бунгача вилоятда охирги марта коронавирусга чалинган бемор 1 майда соғайиб чиққанди. COVID-19’дан тузалганларнинг 6 нафари ушбу ҳудуддан бўлса, 10 нафари Қозоғистон, 1 нафари Туркия фуқаросидир (11 июнь куни вилоятда 27 нафар қозоғистонлик ва 1 нафар туркиялик фуқарода касаллик аниқланганди). Уларнинг 14 нафари эркаклар, 3 нафари аёллар, шунингдек, энг ёши каттаси 51 ёшда, кичиги эса 2019 йилда туғилган.

Эндиликда Қашқадарё вилоятида коронавирус инфекциясидан соғайганларнинг сони 23 нафарга етди. 24 июнь ҳолатига кўра, коронавирусдан даволаниш кўрсаткичи ушбу вилоятда 3 фоизни ташкил этаётганди.

Наманган вилоятида касалликдан фориғ бўлганларнинг барчаси ушбу ҳудуддан. Уларнинг 4 нафари эркаклар ва 1 нафари аёл бўлиб, ёши каттаси 51 ёшда, энг кичиги 2019 йилда туғилган. Бугунги кунда Наманган вилоятида коронавирусдан соғайганлар сони 270 нафарга етди.

25 июнь давомида Ўзбекистонда 90 нафар коронавирус инфекциясига чалинган бемор тузалди. Мамлакатда соғайганлар сони 4775 нафарни ташкил этмоқда.

Ўзбекистонда айни дамда 25 июнь соат 17:00 ҳолатига кўра, 7087 кишида касаллик аниқланиб, улардан 20 нафари коронавирус асоратлари оқибатида вафот этган.