AQSh prezidenti Donald Tramp koronavirus infeksiyasini “Kung-flyu” deb atadi. Bu kabi nomni u Arizona shtatida o‘tkazilgan saylovoldi mitingida taklif qildi, deb yozadi The Hill.
Tramp o‘z chiqishi davomida koronavirusning ko‘plab nomi mavjudligini va u faqat 19 yoki 20 tasini sanab bera olishi mumkinligini ma’lum qilgan.
Prezident “Xitoy virusi”, “Uxan”, shuningdek, “Kung-flyu” (“flu” ing. — gripp) kabi bir nechta nomlarni taklif qilgan. Tramp so‘nggi nom orqali Xitoy jang san’ati hisoblanuvchi “kung-fu”ga nisbatan so‘z o‘yini qilgan.
“Uxan kung-flyu koronavirusiga chalindi”, — deydi Tramp.
The Washington Post’ning yozishicha, Tramp bir necha bor Xitoyni koronavirus epidemiyasi tarqalishida ayblagan va kasallik boshqa mamlakatlarda ham tarqalishidan oldin ham uni “Xitoy virusi” deb atab kelgan.
Eslatib o‘tamiz, avvalroq AQSh prezidenti Donald Tramp Xitoyga COVID-19 tarqalishini surishtirish uchun mutaxassislar yubormoqchi ekanini bildirgandi. Shuningdek, AQSh Xitoydan koronavirusning kelib chiqish sabablari bo‘yicha ma’lumot so‘ragan. AQSh davlat kotibining fikricha, Xitoy kasallik tarqalishi yuzasidan muhim axborotga ega bo‘lgan, ammo uni o‘z vaqtida oshkor qilmagan. Kreml esa bunga qarshi chiqib, Xitoy koronavirusga oid ma’lumotlarni yashirgani to‘g‘risida dalillar yo‘qligini bildirgan.
Izoh (0)