Namanganda oilaviy mojaro oqibatida og‘ir jarohat olgan opa-singillar jonlantirish bo‘limidan chiqdi. 2010-yilda tug‘ilgan Mushtariy va 2012-yilda tug‘ilgan Mubina bundan 10 kun avval bosh miya ochiq jarohatlari bilan Respublika shoshilinch tibbiy yordam ilmiy markazi Namangan filialiga keltirilgan edi.
“Daryo” muxbiri Azizbek Abduvaliyevning xabar berishicha, koma holatida bo‘lgan opa-singillar 1,5—2 soat davomida operatsiya qilingan va ularning hayoti saqlab qolingan.
“Ular bugun jonlashtirish bo‘limidan bolalar jarohatlari xirurgiyasi bo‘limiga o‘tkazildi. Holatlarini nisbatan qoniqarli deb baholash mumkin. Tan jarohatlaridan tashqari kuchli ruhiy stress asoratlari bor, amneziya, ya’ni xotirani yo‘qotish alomatlari kuzatilmoqda”, — deydi filial bolalar jarohatlari xirurgiyasi bo‘limi mudiri Shuhratjon Karimboyev.
Karimboyevga ko‘ra, qizlar bu yerda bir muddat davolanishdan so‘ng bolalar shifoxonasi nevrologiya bo‘limiga yuboriladi va psixologlar kuzatuvida bo‘ladi.
Eslatib o‘tamiz, Namangan shahrining “Yangi zamin” mahallasida joriy yil 13-iyun kuni ro‘y bergan janjal oqibatida 44 yashar erkak 36 yoshli turmush o‘rtog‘ining bosh va bo‘yin sohasiga bolta bilan urib o‘ldirgandi. Shundan so‘ng voyaga yetmagan farzandlari — 10 va 8 yoshli qizlari, shuningdek, 4 oylik chaqalog‘iga bolta bilan tan jarohati yetkazgan va o‘zini yoqib yuborgan. Chaqaloq voqea joyida halok bo‘lgan, ikki nafar qiz esa og‘ir tan jarohati olgandi.
Hozirda ushbu hodisa yuzasidan viloyat prokuraturasi tomonidan tergov harakatlari olib borilmoqda.
Izoh (0)