O‘zbekiston Transport vazirligi vakili odam tiqilinch bo‘lgan avtobusda koronavirus yuqtirmaslik uchun nima qilish kerakligini aytdi

O‘zbekiston Transport vazirligi axborot xizmati rahbari Navro‘z Ashurmatov 23-iyun, seshanba kuni o‘tkazilgan brifingda shahar jamoat transportida yuzaga kelayotgan tiqilinchliklar masalasida savolga javob berdi.

Vazirlik vakiliga “Toshkent shahrida yo‘lovchilar tiqilinch bo‘ladigan kichik avtobuslarni yo‘nalishga chiqmagan katta Mercedes-Benz avtobuslarga almashtirsa bo‘lmaydimi?”mazmunidagi savol berildi.

Navro‘z Ashurmatovning so‘zlariga ko‘ra, “Toshshahartransxizmat” kompaniyasi tarkibiga kiruvchi avtokorxonalar tomonidan 131 ta yo‘nalishda 1067 ta avtobus ishga chiqarilgan.

“Avtobus salonida yetarlicha yo‘lovchi bo‘lsa, o‘z salomatligini o‘ylagan holda unga chiqmaganingiz har jihatdan ma’qul. Ozroq kutsa, keyingi avtobusda bemalol ketish mumkin”, — dedi vazirlik axborot xizmati rahbari.

O‘zbekistonda 8-iyundan “sariq” va “yashil” hududlarda jamoat transportida harakatlanishga ruxsat berildi. Toshkentda avtobus haydovchilari uchun qo‘yilgan kunlik “plan” bekor qilindi. Shahar bo‘ylab transport qatnovlari avtobuslarda amalga oshiriladi, ular poytaxt ichida hamda Toshkent viloyatining “qizil” toifaga kirmagan hududlari yo‘nalishlari bo‘yicha qatnaydi.

Respublika maxsus komissiyasining xabariga ko‘ra, jamoat transportida olib borilgan monitoring natijalari avtobus salonida ijtimoiy masofani saqlash bilan bog‘liq karantin talablarini buzib, tirbandlik hosil qilgan holda yo‘lovchi tashish holatlari uchrayotganligini ko‘rsatmoqda. Bu esa aholi o‘rtasida koronavirus infeksiyasi tarqalishiga sabab bo‘lishi mumkin bo‘lgan holat sifatida epidemiyalarga qarshi kurash qoidalarini buzganlik uchun javobgarlikka tortishga asos bo‘ladi.

Shu munosabat bilan Sanitariya-epidemiologiya nazorati davlat inspeksiyasi va Transport vazirligiga avtobus reyslarida tirbandlikka yo‘l qo‘ymaslik hamda boshqa sanitariya-epidemiologiya talablariga qat’iy rioya etilishi ustidan nazoratni kuchaytirish topshirildi.

Avvalroq “Toshshahartransxizmat” avtobuslar harakatining dastlabki kunlarida ayrim yo‘nalishlarda karantin qoidalarining qo‘pol ravishda buzilishi holatlari kuzatilganini ma’lum qilgandi.