Maktabgacha ta’lim vaziri Agrippina Shin boshchiligidagi ishchi guruh Buxoro viloyatiga tashrif buyurib, viloyat maktabgacha ta’lim boshqarmasi hamda tuman, shahar bo‘limlari faoliyatini o‘rgandi. Bu haqda “Daryo”ga viloyat maktabgacha ta’lim boshqarmasi axborot xizmati rahbari Bekzod Ne’matov ma’lum qildi.
Vazir tashrifi davomida MTTlardagi ta’lim-tarbiya jarayoni, moliyaviy, yuridik hamda xodimlar tomonidan yuritilgan ish hujjatlari o‘rganilgan va kamchiliklar aniqlangan.
Jumladan, karantin davrida xodimlarni masofaviy ishlashga chaqirganlik bo‘yicha hujjatlarning yo‘qligi, xodimlar ishdan bo‘shatilganiga qaramay, ularga ishdan bo‘shash sababi tushuntirilmagan va mehnat daftarchalari qaytarilmagani ma’lum bo‘lgan.
Shuningdek, qator ta’lim tashkilotlarida sanitariya-gigiyena holatlari, obodonlashtirish ishlari qoniqarsiz ahvolda ekani aniqlangan. Shunga ko‘ra, o‘z ishiga sovuqqonlik bilan qaragan Kogon shahri va Kogon tumani, Buxoro, Peshku, Jondor tumanidagi olti nafar maktabgacha ta’lim tashkiloti rahbariga intizomiy chora qo‘llanilib, ikki nafar rahbar lavozimidan ozod etilgan. Bundan tashqari, Buxoro maktabgacha ta’lim boshqarmasi hamda tuman, shahar bo‘limlarida faoliyat yuritib kelgan uch nafar xodim ham ishdan bo‘shatilgan.
“Buxoro shahridagi pedagogika kollejini kapital ta’mirlab, namuna sifatida bo‘sh turgan binolarga davlat xususiy-sherikchiligi asosida maktabgacha ta’lim tashkilotini tuzamiz”, — degan vazir Agrippina Shin.
Vazir, shuningdek, 2020-yilning 27-aprel kuni sodir bo‘lgan kuchli shamol oqibatidan talafot ko‘rgan Olot va Qorako‘l tumanidagi bog‘chalar ahvoli bilan tanishgan.
Olotdagi uchta maktabgacha ta’lim tashkilotida aniqlangan kamchiliklarni bartaraf etib, ularni kapital ta’mirlash uchun mutassaddilarga ko‘rsatma bergan.
Qorako‘l tumanidagi pedagogika kolleji binosini ham kapital ta’mirlashga kelishib olingan. Kollejning bo‘sh turgan binosida maktabgacha ta’lim tashkilotini tuzish bo‘yicha ko‘rsatma bergan.
“Qorako‘l tumani matematika bo‘yicha yuqori o‘rinda turadi. Kollejni ta’mirlagandan keyin ta’lim muassasasida matematika fani bo‘yicha qayta tayyorlov kurslarini tashkil etish kerak”, — dedi vazir.
Ma’lum qilinishicha, viloyatda jami 1041 ta maktabgacha ta’lim tashkiloti bo‘lib, shundan 409 tasi davlat, 632 tasi nodavlat maktabgacha ta’lim tashkiloti hisoblanadi. Viloyatda 3-7 yoshgacha bo‘lgan bolalar soni 145 893 nafarni tashkil etadi, shundan 84 711 nafari maktabgacha ta’lim tashkilotlarida qamrab olingan.
Izoh (0)