Мактабгача таълим вазири Агриппина Шин бошчилигидаги ишчи гуруҳ Бухоро вилоятига ташриф буюриб, вилоят мактабгача таълим бошқармаси ҳамда туман, шаҳар бўлимлари фаолиятини ўрганди. Бу ҳақда «Дарё»га вилоят мактабгача таълим бошқармаси ахборот хизмати раҳбари Бекзод Неъматов маълум қилди.
Вазир ташрифи давомида МТТлардаги таълим-тарбия жараёни, молиявий, юридик ҳамда ходимлар томонидан юритилган иш ҳужжатлари ўрганилган ва камчиликлар аниқланган.
Жумладан, карантин даврида ходимларни масофавий ишлашга чақирганлик бўйича ҳужжатларнинг йўқлиги, ходимлар ишдан бўшатилганига қарамай, уларга ишдан бўшаш сабаби тушунтирилмаган ва меҳнат дафтарчалари қайтарилмагани маълум бўлган.
Шунингдек, қатор таълим ташкилотларида санитария-гигиена ҳолатлари, ободонлаштириш ишлари қониқарсиз аҳволда экани аниқланган. Шунга кўра, ўз ишига совуққонлик билан қараган Когон шаҳри ва Когон тумани, Бухоро, Пешку, Жондор туманидаги олти нафар мактабгача таълим ташкилоти раҳбарига интизомий чора қўлланилиб, икки нафар раҳбар лавозимидан озод этилган. Бундан ташқари, Бухоро мактабгача таълим бошқармаси ҳамда туман, шаҳар бўлимларида фаолият юритиб келган уч нафар ходим ҳам ишдан бўшатилган.
«Бухоро шаҳридаги педагогика коллежини капитал таъмирлаб, намуна сифатида бўш турган биноларга давлат хусусий-шерикчилиги асосида мактабгача таълим ташкилотини тузамиз», — деган вазир Агриппина Шин.
Вазир, шунингдек, 2020 йилнинг 27 апрель куни содир бўлган кучли шамол оқибатидан талафот кўрган Олот ва Қоракўл туманидаги боғчалар аҳволи билан танишган.
Олотдаги учта мактабгача таълим ташкилотида аниқланган камчиликларни бартараф этиб, уларни капитал таъмирлаш учун мутассаддиларга кўрсатма берган.
Қоракўл туманидаги педагогика коллежи биносини ҳам капитал таъмирлашга келишиб олинган. Коллежнинг бўш турган биносида мактабгача таълим ташкилотини тузиш бўйича кўрсатма берган.
«Қоракўл тумани математика бўйича юқори ўринда туради. Коллежни таъмирлагандан кейин таълим муассасасида математика фани бўйича қайта тайёрлов курсларини ташкил этиш керак», — деди вазир.
Маълум қилинишича, вилоятда жами 1041 та мактабгача таълим ташкилоти бўлиб, шундан 409 таси давлат, 632 таси нодавлат мактабгача таълим ташкилоти ҳисобланади. Вилоятда 3-7 ёшгача бўлган болалар сони 145 893 нафарни ташкил этади, шундан 84 711 нафари мактабгача таълим ташкилотларида қамраб олинган.
Изоҳ (0)