Qashqadaryo viloyati Qamashi tumanida sotuvchi telefon sotib olgan xaridorni 50 ming so‘m qarz uchun urib, uning o‘limiga sababchi bo‘ldi. Bu haqda Ichki ishlar vazirligi huzuridagi Tergov departamenti xabar berdi.
Ma’lum qilinishicha, 2020-yil 16-iyun kuni, taxminan, soat 10:20 da Qashqadaryo viloyati Qamashi tumani Iftixor ko‘chasida joylashgan “Hunarmand” savdo majmuasidagi do‘kon xodimi A.L. 2020-yil 27-aprel kuni Redmi 8A rusumli uyali telefon apparatini 1 600 000 so‘mga sotib olib, shundan to‘lanmay qolgan 250 000 so‘m qarzini berish maqsadida do‘konga kelgan xaridor E.S.dan 300 000 so‘m berishini talab qilib, u bilan o‘zaro janjallashgan.
Shundan so‘ng A.L. do‘kon tashqarisiga chiqib, E.S.ning yuzi va bosh qismiga mushti bilan bir necha marotaba urgan. Natijada E.S. yerga bosh qismi bilan yiqilib, tan jarohati olgan va tuman tibbiyot birlashmasiga yotqizilgan. Ko‘rsatilgan tibbiy muolajalarga qaramasdan E.S. olgan tan jarohatlari oqibatida vafot etgan.
Sud tibbiy ekspertiza xulosasiga ko‘ra, E.S. bosh miyaning yopiq jarohati, ensa suyagining chiziqli sinishi va boshqa ko‘rinishdagi hayot uchun xavfli bo‘lgan og‘ir tan jarohati olgan.
Mazkur holat yuzasidan Qamashi tuman IIB huzuridagi Tergov bo‘limi tomonidan A.L.ga nisbatan O‘zbekiston Respublikasi Jinoyat kodeksining 104-moddasi 3-qismi “d” bandi (Jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, gumonlanuvchi protsessual tartibda ushlangan.
Qayd etilishicha, mazkur jinoyatni sodir etgan shaxs 8-10 yilgacha ozodlikdan mahrum qilish bilan jazolanishi mumkin.
Mavzuga doir:
Izoh (0)