Қашқадарё вилояти Қамаши туманида сотувчи телефон сотиб олган харидорни 50 минг сўм қарз учун уриб, унинг ўлимига сабабчи бўлди. Бу ҳақда Ички ишлар вазирлиги ҳузуридаги Тергов департаменти хабар берди.
Маълум қилинишича, 2020 йил 16 июнь куни, тахминан, соат 10:20 да Қашқадарё вилояти Қамаши тумани Ифтихор кўчасида жойлашган «Ҳунарманд» савдо мажмуасидаги дўкон ходими А.Л. 2020 йил 27 апрель куни Redmi 8А русумли уяли телефон аппаратини 1 600 000 сўмга сотиб олиб, шундан тўланмай қолган 250 000 сўм қарзини бериш мақсадида дўконга келган харидор Э.С.дан 300 000 сўм беришини талаб қилиб, у билан ўзаро жанжаллашган.
Шундан сўнг А.Л. дўкон ташқарисига чиқиб, Э.С.нинг юзи ва бош қисмига мушти билан бир неча маротаба урган. Натижада Э.С. ерга бош қисми билан йиқилиб, тан жароҳати олган ва туман тиббиёт бирлашмасига ётқизилган. Кўрсатилган тиббий муолажаларга қарамасдан Э.С. олган тан жароҳатлари оқибатида вафот этган.
Суд тиббий экспертиза хулосасига кўра, Э.С. бош миянинг ёпиқ жароҳати, энса суягининг чизиқли синиши ва бошқа кўринишдаги ҳаёт учун хавфли бўлган оғир тан жароҳати олган.
Мазкур ҳолат юзасидан Қамаши туман ИИБ ҳузуридаги Тергов бўлими томонидан А.Л.га нисбатан Ўзбекистон Республикаси Жиноят кодексининг 104-моддаси 3-қисми «д» банди (Жабрланувчининг ўлишига сабаб бўлган қасддан баданга оғир шикаст етказиш) билан жиноят иши қўзғатилиб, гумонланувчи процессуал тартибда ушланган.
Қайд этилишича, мазкур жиноятни содир этган шахс 8-10 йилгача озодликдан маҳрум қилиш билан жазоланиши мумкин.
Изоҳ (0)