Qashqadaryo viloyati Qarshi tumanidagi umumta’lim maktablaridan birining o‘qituvchilari ish haqidan aprel oyida noqonuniy ushlab qolingani sababli tuman Xalq ta’limi bo‘limi mudiri jarimaga tortildi. Bu haqda Bandlik va mehnat munosabatlari vazirligi xabar berdi.
Ma’lum qilinishicha, Qashqadaryo viloyat Bandlik bosh boshqarmasi Davlat mehnat inspeksiyasi tomonidan o‘rganish o‘tkazilgan. O‘rganish jarayonida Qarshi tumanidagi umumta’lim maktabi o‘qituvchilarining 2020-yil aprel oyi ish haqidan mehnat qonunchiligi talablariga zid ravishda ushlab qolinganligi aniqlangan.
Vazirlik tomonidan ma’lum qilinishicha, mazkur holat yuzasidan Qarshi tumani Xalq ta’limi bo‘limi mudiriga nisbatan ma’muriy jarima qo‘llanilgan. Ayni damda noqonuniy ushlab qolingan ish haqlarini undirish choralari ko‘rilmoqda.
Avvalroq Buxoro viloyati Peshku tumanida bolalar va o‘smirlar sport maktabi xodimlarining majburiy mehnatga jalb etilgani hamda buning ortidan sport murabbiyining oilasida muammo yuzaga kelgani haqida xabar berilgandi. Shuningdek, Samarqandda Hisob palatasi tekshiruvini yopish uchun o‘qituvchilardan pul yig‘gan maktab direktori ishdan olingandi.
Izoh (0)