Қашқадарё вилояти Қарши туманидаги умумтаълим мактабларидан бирининг ўқитувчилари иш ҳақидан апрель ойида ноқонуний ушлаб қолингани сабабли туман Халқ таълими бўлими мудири жаримага тортилди. Бу ҳақда Бандлик ва меҳнат муносабатлари вазирлиги хабар берди.
Маълум қилинишича, Қашқадарё вилоят Бандлик бош бошқармаси Давлат меҳнат инспекцияси томонидан ўрганиш ўтказилган. Ўрганиш жараёнида Қарши туманидаги умумтаълим мактаби ўқитувчиларининг 2020 йил апрель ойи иш ҳақидан меҳнат қонунчилиги талабларига зид равишда ушлаб қолинганлиги аниқланган.
Вазирлик томонидан маълум қилинишича, мазкур ҳолат юзасидан Қарши тумани Халқ таълими бўлими мудирига нисбатан маъмурий жарима қўлланилган. Айни дамда ноқонуний ушлаб қолинган иш ҳақларини ундириш чоралари кўрилмоқда.
Аввалроқ Бухоро вилояти Пешку туманида болалар ва ўсмирлар спорт мактаби ходимларининг мажбурий меҳнатга жалб этилгани ҳамда бунинг ортидан спорт мураббийининг оиласида муаммо юзага келгани ҳақида хабар берилганди. Шунингдек, Самарқандда Ҳисоб палатаси текширувини ёпиш учун ўқитувчилардан пул йиғган мактаб директори ишдан олинганди.
Изоҳ (0)