O‘zbekistonning Turkiyadagi elchixonasi ushbu mamlakat hududida vaqtinchalik bo‘lib turgan O‘zbekiston fuqarolariga eslatma bilan chiqdi.
“Turkiyada COVID-19 epidemiyasi tufayli parvozlarning bekor qilinishi natijasida viza/vaqtincha ro‘yxatdan o‘tish muhlati o‘tgan O‘zbekiston fuqarolariga nisbatan jazolar qo‘llanilmasligi haqida mamlakat hukumati tomonidan qaror qabul qilingan edi.
Turkiyada epidemiologik vaziyat barqarorlashib borishi, qator xorijiy davlatlar bilan aviaqatnov tiklanishi sababli Turkiya hukumati bu yo‘nalishda qo‘shimcha choralar qabul qilmoqda”, — deyiladi murojaatda.
Ta’kidlanishicha, Turkiya IIV tomonidan tarqalgan yo‘riqnomaga asosan, mamlakat hududini ma’lum sabablarga ko‘ra tark etmagan chet el fuqarolari (transport aloqalari to‘xtatilgan vaqtdan vaziyat normallashgan muddatga qadar) hamda kirish vizasi va vaqtincha ro‘yxatdan o‘tish muhlati o‘tgan xorijiy fuqarolar Turkiyaning o‘z davlatlari bilan transport qatnoviga ruxsat berilganidan so‘ng bir oy ichida chiqib ketishi yoki viza/vaqtincha ro‘yxatdan o‘tish muddatini qaytadan rasmiylashtirishi zarur.
“Shu sababli Turkiya hududida bo‘lib turgan O‘zbekiston fuqarolariga Turkiya tomonidan qabul qilingan ushbu qaror talablarini hisobga olgan holda koronavirus kasalligidan o‘zini himoyalash bo‘yicha barcha zarur talablarga rioya etish tavsiya etiladi”, — deyiladi elchixona tomonidan.
Avvalroq Turkiya 10-iyundan boshlab 40 ta mamlakat bilan aviaqatnovlarni tiklashi, ro‘yxatda O‘zbekiston ham borligi to‘g‘risida xabar berilgandi. Turkish Airlines kompaniyasi 2020-yil 1-iyuldan boshlab Istanbul–Toshkent–Istanbul reyslari yo‘lga qo‘yilishini ma’lum qildi.
Eslatib o‘tamiz, Turkiya hukumati 18-iyun kuni mamlakatdagi 81 ta viloyatning 42 tasida aholiga jamoat joylarida tibbiy niqob taqib yurishning majburiy tartibini joriy etdi.
Izoh (0)