18-iyun kuni Toshkent shahar IIBB sayti va Facebook’dagi sahifasida poytaxt IIBB xodimlari “Saxovat va ko‘mak” harakatida faol ishtirok etayotgani haqidagi xabar e’lon qilindi. Xabarda Yashnobod tumani IIO FMB xodimlari boshliq, podpolkovnik Tohirjon Zuparov boshchiligida tumanda yashovchi va moddiy yordam hamda ijtimoiy ko‘makka muhtoj 10 ta oiladan xabar olib, ularga oziq-ovqat to‘plamlarini topshirgani aytiladi.
Xabarga ilova qilingan suratlarda Yashnobod tumani IIO FMB rahbari, podpolkovnik Tohirjon Zuparovning yuziga fotoshop dasturi yordamida tibbiy niqob chizib qo‘yilganini ko‘rish mumkin. Ayniqsa Tohirjon Zuparovning xonadonlardan birida ko‘zgu oldida turib, fuqaro bilan suhbatlashayotgani aks etgan surat rahbarning niqobsiz holda odamlar bilan uchrashuvga borganini yaqqol ko‘rsatib qo‘ygan. Suratda Tohirjon Zuparovning yuzida niqob bor, uning ko‘zgudagi aksi esa niqobsiz ko‘rinadi.
Bu holat ijtimoiy tarmoqlar foydalanuvchilarining kulgili izohlariga, qizg‘in muhokamalariga sabab bo‘ldi. Suratlar internetda keng tarqala boshlaganidan so‘ng ushbu xabar poytaxt IIBBning Facebook’dagi sahifasidan o‘chirib tashlandi. Boshqarma saytida esa Tohirjon Zuparovning niqobsiz yurganini fosh etgan ko‘zgu oldidagi surat olib tashlandi.
Bir oy avval Toshkent shahar IIBB koronavirusning tarqalishini oldini olish bo‘yicha Respublika maxsus komissiyasi tomonidan karantin choralarini yumshatish bo‘yicha qaror qabul qilingach, ayrim fuqarolar sanitariya-epidemiologiya qoidalariga umuman rioya qilmay qo‘yganini qayd etgandi.
O‘shanda shahar ko‘chalarida tibbiy niqob taqmagan yoki uni to‘g‘ri taqmasdan yurgan fuqarolar haqida tumanlar kesimida ma’lumotlar taqdim etilgandi. Ma’lumotlardan 16 va 17-may kuni eng ko‘p qoidabuzarlik Yashnobod tumanida qayd etilayotganini ko‘rish mumkin edi.
Toshkent shahar IIBB tarqatgan suratlardan so‘ng niqob taqishni qoidalarini eng ko‘p buzadigan Yashnobod tumanida IIB boshlig‘i ham qoidabuzar ekanligi ma’lum bo‘ldi.
Toshkent shahar IIBB tomonidan bir oy avval — 18-may kuni chop etilgan xabardan parcha:
Toshkent shahar IIBB xodimlari va sanitariya-epidemiologiya nazorati xizmati ishchilaridan eslatma berilgan: Ma’muriy javobgarlik to‘g‘risidagi kodeksining 54-moddasiga (Epidemiyalarga qarshi kurash qoidalarini buzish) binoan karantin va inson uchun xavfli bo‘lgan boshqa yuqumli kasalliklar paydo bo‘lishi hamda tarqalishi sharoitida vakolatli organning maxsus talablariga zid ravishda jamoat joylarida niqobsiz bo‘lish, fuqarolarga bazaviy hisoblash miqdorining yigirma baravaridan o‘ttiz baravarigacha, mansabdor shaxslarga esa o‘ttiz baravaridan ellik baravarigacha miqdorda jarima solishga sabab bo‘ladi.“Troll.uz” Telegram kanali muallifi poytaxt IIBB saytida avval e’lon qilingan bir nechta xabarda ham ichki ishlar xodimlari hamda fuqarolarning yuziga niqob chizib qo‘yilganini aniqladi:
Izoh (0)