18 июнь куни Тошкент шаҳар ИИББ сайти ва Facebook’даги саҳифасида пойтахт ИИББ ходимлари «Саховат ва кўмак» ҳаракатида фаол иштирок этаётгани ҳақидаги хабар эълон қилинди. Хабарда Яшнобод тумани ИИО ФМБ ходимлари бошлиқ, подполковник Тоҳиржон Зупаров бошчилигида туманда яшовчи ва моддий ёрдам ҳамда ижтимоий кўмакка муҳтож 10 та оиладан хабар олиб, уларга озиқ-овқат тўпламларини топширгани айтилади.
Хабарга илова қилинган суратларда Яшнобод тумани ИИО ФМБ раҳбари, подполковник Тоҳиржон Зупаровнинг юзига фотошоп дастури ёрдамида тиббий ниқоб чизиб қўйилганини кўриш мумкин. Айниқса Тоҳиржон Зупаровнинг хонадонлардан бирида кўзгу олдида туриб, фуқаро билан суҳбатлашаётгани акс этган сурат раҳбарнинг ниқобсиз ҳолда одамлар билан учрашувга борганини яққол кўрсатиб қўйган. Суратда Тоҳиржон Зупаровнинг юзида ниқоб бор, унинг кўзгудаги акси эса ниқобсиз кўринади.
Бу ҳолат ижтимоий тармоқлар фойдаланувчиларининг кулгили изоҳларига, қизғин муҳокамаларига сабаб бўлди. Суратлар интернетда кенг тарқала бошлаганидан сўнг ушбу хабар пойтахт ИИББнинг Facebook’даги саҳифасидан ўчириб ташланди. Бошқарма сайтида эса Тоҳиржон Зупаровнинг ниқобсиз юрганини фош этган кўзгу олдидаги сурат олиб ташланди.
Бир ой аввал Тошкент шаҳар ИИББ коронавируснинг тарқалишини олдини олиш бўйича Республика махсус комиссияси томонидан карантин чораларини юмшатиш бўйича қарор қабул қилингач, айрим фуқаролар санитария-эпидемиология қоидаларига умуман риоя қилмай қўйганини қайд этганди.
Ўшанда шаҳар кўчаларида тиббий ниқоб тақмаган ёки уни тўғри тақмасдан юрган фуқаролар ҳақида туманлар кесимида маълумотлар тақдим этилганди. Маълумотлардан 16 ва 17 май куни энг кўп қоидабузарлик Яшнобод туманида қайд этилаётганини кўриш мумкин эди.
Тошкент шаҳар ИИББ тарқатган суратлардан сўнг ниқоб тақишни қоидаларини энг кўп бузадиган Яшнобод туманида ИИБ бошлиғи ҳам қоидабузар эканлиги маълум бўлди.
Тошкент шаҳар ИИББ томонидан бир ой аввал — 18 май куни чоп этилган хабардан парча:
Тошкент шаҳар ИИББ ходимлари ва санитария-эпидемиология назорати хизмати ишчиларидан эслатма берилган: Маъмурий жавобгарлик тўғрисидаги кодексининг 54-моддасига (Эпидемияларга қарши кураш қоидаларини бузиш) биноан карантин ва инсон учун хавфли бўлган бошқа юқумли касалликлар пайдо бўлиши ҳамда тарқалиши шароитида ваколатли органнинг махсус талабларига зид равишда жамоат жойларида ниқобсиз бўлиш, фуқароларга базавий ҳисоблаш миқдорининг йигирма бараваридан ўттиз бараваригача, мансабдор шахсларга эса ўттиз бараваридан эллик бараваригача миқдорда жарима солишга сабаб бўлади.«Troll.uz» Telegram канали муаллифи пойтахт ИИББ сайтида аввал эълон қилинган бир нечта хабарда ҳам ички ишлар ходимлари ҳамда фуқароларнинг юзига ниқоб чизиб қўйилганини аниқлади:
Изоҳ (0)