Amerikaning yirik shaharlaridagi tibbiyot tashkilotlari turli shtatlarni qamrab olgan ommaviy norozilik namoyishlaridan so‘ng koronavirus bilan kasallanish avj olmaganini ma’lum qildi. The Wall Street Journal’ning yozishicha, shifokorlar bu kabi xulosaga namoyish ishtirokchilari ommaviy testdan o‘tkazilganidan so‘ng kelgan.
Masalan, Minnesotada afroamerikalik Jorj Floydning o‘limi sabab boshlangan namoyishlarda minglab odam ko‘chaga chiqqan bo‘lib, shifokorlar 11 ming kishini testdan o‘tkazgan. Aniqlanishicha, norozilik namoyishi ishtirokchilari orasida kasallanish holati 1 foizdan ham kamroq. Ushbu ma’lumotni shtat Sog‘liqni saqlash departamenti rahbari Kris Eresmann ham tasdiqlagan.
Black lives matter aksiyasining episentrlaridan biriga aylangan Nyu-Yorkda ham ommaviy norozilik namoyishi ishtirokchilarining 3 foizidan kamrog‘ida kasallanish holati qayd etilgan. Shu bilan birga, shaharda kasalxonadagi bemorlar soni kamaya boshlagan. Nyu-York meri Bill de Blazioning ogohlantirishicha, bu vaqtinchalik ko‘rsatkichlar bo‘lib, norozilik namoyishining kasallikka ta’sirini keyingi hafta aniqlash mumkin.
Shuningdek, Chikago va Sietlda ham koronavirus bilan kasallanish sur’atining oshishi kuzatilmagan.
Mutaxassislarning fikricha, kasallar sonining ortib ketmaganiga bir nechta omillar ta’sir ko‘rsatgan. Birinchidan, koronavirusning yashirin davri 14 kunga teng, shu sababli kasallar soni ortishi mumkin. Ikkinchidan, namoyish ishtirokchilarining aksariyati yoshlar — ular infeksiyani belgisiz tashuvchi bo‘lishi mumkin. Uchinchidan, norozilik aksiyalari ochiq maydonlarda bo‘lib o‘tmoqda, bu kasallikka chalinish ehtimolligini kamaytiradi. Bundan tashqari, norozilik namoyishi ishtirokchilarining ko‘pchiligi niqob taqib olgan.
Avvalroq olimlar AQShda COVID-19 sabab qayd etilgan o‘limlar soni oktabrga borib 200 mingtaga yetishini prognoz qilgani to‘g‘risida xabar berilgandi.
Eslatib o‘tamiz, may oyi oxirida afroamerikalik Jorj Floydni Minneapolisda politsiya xodimlari qo‘lga olgan va ko‘chada bir nafar xodim tomonidan tizza bilan bo‘g‘ib qiynoqqa solingan, yakunda Floyd kasalxonada vafot etgan. Uning o‘limi AQSh hamda Yevropada irqchilik va ijtimoiy tengsizlik muammolariga qarshi norozilik namoyishlarining boshlanishiga turtki bo‘ldi. Keyinroq Donald Tramp politsiyani isloh qilish to‘g‘risidagi qarorni imzolab, politsiyachilarga bo‘g‘ish usulini qo‘llashni taqiqlab qo‘ydi.
Izoh (0)