AQSh prezidentining milliy xavfsizlik bo‘yicha sobiq maslahatchisi Jon Bolton o‘zining “Bu yuz bergan xona: Oq uy memuarlari” kitobida yozishicha, Donald Tramp Buyuk Britaniyaning yadro quroli borligini bilmagan. Bu haqda “RBK” xabar bermoqda. Hali nashr etilmagan kitobning mazkur parchasi The New York Times tomonidan taqdim etilgan.
Bundan tashqari, Donald Tramp “Finlyandiya Rossiya tarkibiga kiradimi?”, deb so‘ragan.
71 yoshli Jon Bolton 2018-yilning aprel oyidan Trampning milliy xavfsizlik bo‘yicha maslahatchisi bo‘lgan. 2019-yilning kuzida u prezident tashabbusi bilan iste’foga chiqqan. Tramp Boltonning bo‘shatilishiga ular o‘rtasida yuzaga kelgan kelishmovchilik sabab bo‘lganini aytgan.
Sobiq maslahatchining “Bu yuz bergan xona: Oq uy memuarlari” kitobi 23-iyun kuni to‘liq nashr etilishi kerak. Kitob hozirgi paytda Amazon’da oldindan buyurtma asosida sotilmoqda va eng ko‘p sotiladigan kitoblar 100 taligida yetakchilik qilmoqda.
Bolton memuarlarining dastlabki parchalari joriy yilning yanvar oyida nashr qilingan. Ularda Tramp Ukrainaga beriladigan harbiy yordamni muzlatib qo‘yishni xohlagani aytiladi. Bunga sabab sifatida Tramp uning 2020-yildagi saylovda ehtimoliy raqibi Jo Bayden va uning o‘g‘li Hanterga nisbatan tergovda Kiyevdan yordam olish istagi ko‘rsatilgan.
Avvalroq Jo Bolton Tramp AQSh prezidentligiga qayta saylanishi uchun Si Szinpindan yordam so‘ragani haqida ma’lum qilgan edi.
Memuardagi tezislarga javoban Tramp Boltonni yolg‘onchilikda ayblagan, shuningdek, Bolton ishda ko‘p xatoliklarga yo‘l qo‘ygani, agar uning gapiga quloq solganida hozir “oltinchi jahon urishi”ga olib kelgan bo‘lishi mumkinligini aytgan.
Mazkur kitob sababli AQSh Adliya vazirligi sobiq maslahatchini sudga berdi. Vazirlikning ta’kidlashicha, Boltonning Oq uydagi faoliyati haqidagi 500 sahifalik qo‘lyozma maxfiy ma’lumotlarga boy. Amerika hukumati ushbu ma’lumotni oshkor qilayotgan sobiq yordamchi lavozimga qabul qilinganidan keyin olgan majburiyatlarini buzganligini ta’kidlamoqda.
Ma’lumot uchun, Jon Bolton Oq uyni o‘z Twitter akkauntini bloklaganlikda ayblagan, shuningdek, u AQShning Shimoliy Koreya bo‘yicha siyosatini “samarasiz va muvaffaqiyatsiz” deb baholagan.
Izoh (0)