Американинг йирик шаҳарларидаги тиббиёт ташкилотлари турли штатларни қамраб олган оммавий норозилик намойишларидан сўнг коронавирус билан касалланиш авж олмаганини маълум қилди. The Wall Street Journal’нинг ёзишича, шифокорлар бу каби хулосага намойиш иштирокчилари оммавий тестдан ўтказилганидан сўнг келган.
Масалан, Миннесотада афроамерикалик Жорж Флойднинг ўлими сабаб бошланган намойишларда минглаб одам кўчага чиққан бўлиб, шифокорлар 11 минг кишини тестдан ўтказган. Аниқланишича, норозилик намойиши иштирокчилари орасида касалланиш ҳолати 1 фоиздан ҳам камроқ. Ушбу маълумотни штат Соғлиқни сақлаш департаменти раҳбари Крис Эресманн ҳам тасдиқлаган.
Black lives matter акциясининг эпицентрларидан бирига айланган Нью-Йоркда ҳам оммавий норозилик намойиши иштирокчиларининг 3 фоизидан камроғида касалланиш ҳолати қайд этилган. Шу билан бирга, шаҳарда касалхонадаги беморлар сони камая бошлаган. Нью-Йорк мэри Билл де Блазионинг огоҳлантиришича, бу вақтинчалик кўрсаткичлар бўлиб, норозилик намойишининг касалликка таъсирини кейинги ҳафта аниқлаш мумкин.
Шунингдек, Чикаго ва Сиэтлда ҳам коронавирус билан касалланиш суръатининг ошиши кузатилмаган.
Мутахассисларнинг фикрича, касаллар сонининг ортиб кетмаганига бир нечта омиллар таъсир кўрсатган. Биринчидан, коронавируснинг яширин даври 14 кунга тенг, шу сабабли касаллар сони ортиши мумкин. Иккинчидан, намойиш иштирокчиларининг аксарияти ёшлар — улар инфекцияни белгисиз ташувчи бўлиши мумкин. Учинчидан, норозилик акциялари очиқ майдонларда бўлиб ўтмоқда, бу касалликка чалиниш эҳтимоллигини камайтиради. Бундан ташқари, норозилик намойиши иштирокчиларининг кўпчилиги ниқоб тақиб олган.
Аввалроқ олимлар АҚШда COVID-19 сабаб қайд этилган ўлимлар сони октябрга бориб 200 мингтага етишини прогноз қилгани тўғрисида хабар берилганди.
Эслатиб ўтамиз, май ойи охирида афроамерикалик Жорж Флойдни Миннеаполисда полиция ходимлари қўлга олган ва кўчада бир нафар ходим томонидан тизза билан бўғиб қийноққа солинган, якунда Флойд касалхонада вафот этган. Унинг ўлими АҚШ ҳамда Европада ирқчилик ва ижтимоий тенгсизлик муаммоларига қарши норозилик намойишларининг бошланишига туртки бўлди. Кейинроқ Дональд Трамп полицияни ислоҳ қилиш тўғрисидаги қарорни имзолаб, полициячиларга бўғиш усулини қўллашни тақиқлаб қўйди.
Изоҳ (0)