“Rostov”ning olti nafar futbolchisida koronavirus infeksiyasi uchun topshirilgan test natijalari ijobiy chiqqan. Shu bois klubning 42 nafar futbolchi, murabbiy va xodimlari ikki hafta muddatga karantinga olinadi. Bu haqda klub matbuot xizmati xabar bermoqda.
“Rostov” keyingi ikki hafta ichida “Sochi” (19-iyun), “Arsenal” (27-iyun) va “Krasnodar” (1-iyul) klublari bilan o‘yin o‘tkazishi kerak edi.
Jamoaning olti nafar futbolchisi — Roman Yeremenko, Dennis Xadjikadunich, Xoren Bayramyan, Matias Normann, Ivelin Popov va Arseniy Logashov COVID-19’ni yuqtirib olgan.
O‘zbekiston terma jamoasi hujumchisi Eldor Shomurodov ham “Rostov” klubi a’zosi hisoblanadi. Shomurodov jamoasi Premyer Liganing 22-turidan keyin 38 ochko to‘plagan holda, musobaqa jadvalining 4-pog‘onasidan joy olgan.
Eldor Shomurodov esa 11 ta gol urgan holda to‘purarlar poygasida Artyom Dzyubadan (13 ta gol) so‘ng ikkinchi o‘rinda bormoqda.
Eslatib o‘tamiz, Rossiya Premyer Ligasi bahslari 19-iyundan qayta davom ettiriladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)