«Ростов»нинг олти нафар футболчисида коронавирус инфекцияси учун топширилган тест натижалари ижобий чиққан. Шу боис клубнинг 42 нафар футболчи, мураббий ва ходимлари икки ҳафта муддатга карантинга олинади. Бу ҳақда клуб матбуот хизмати хабар бермоқда.
«Ростов» кейинги икки ҳафта ичида «Сочи» (19 июнь), «Арсенал» (27 июнь) ва «Краснодар» (1 июль) клублари билан ўйин ўтказиши керак эди.
Жамоанинг олти нафар футболчиси — Роман Еременко, Деннис Хаджикадунич, Хорен Байрамян, Матиас Норманн, Ивелин Попов ва Арсений Логашов COVID-19’ни юқтириб олган.
Ўзбекистон терма жамоаси ҳужумчиси Элдор Шомуродов ҳам «Ростов» клуби аъзоси ҳисобланади. Шомуродов жамоаси Премьер Лиганинг 22-туридан кейин 38 очко тўплаган ҳолда, мусобақа жадвалининг 4-поғонасидан жой олган.
Элдор Шомуродов эса 11 та гол урган ҳолда тўпурарлар пойгасида Артём Дзюбадан (13 та гол) сўнг иккинчи ўринда бормоқда.
Эслатиб ўтамиз, Россия Премьер Лигаси баҳслари 19 июндан қайта давом эттирилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)