Қашқадарё вилоятидаги мавжуд болалар боғчаларининг ичимлик сувига бўлган эҳтиёжини қондириш мақсадида мактабгача таълим бошқармасига қарашли сув ташувчи автомобиль фаолияти йўлга қўйилади. Бу ҳақда вилоят мактабгача таълим бошқармаси бошлиғи Асрор Алимардонов маълум қилди, дея хабар берди «Дарё» мухбири.
Маълум бўлишича, жорий йилнинг 16 июнь куни Қарши шаҳридаги Журналистлар уйида Қашқадарё вилоят мактабгача таълим бошқармаси бошлиғи Асрор Алимардонов иштирокида матбуот брифинги бўлиб ўтган.
Брифингда сўз олган Асрор Алимардонов вилоятдаги мавжуд 1284 та боғчаларда ичимлик суви муаммо бўлаётгани, мазкур муаммони ечиш мақсадида боғчаларга сув етказиб берувчи автомобиль ажратилиши кўзда тутилганини таъкидлаган.
«Ёз ойларида вилоятдаги барча боғчаларда ичимлик суви муаммо бўлади. Сувга бўлган эҳтиёжнинг ортиши боис сув учун ажратилган маблағ етмай қолади. Мазкур муаммони ечиш мақсадида ичимлик суви учун катта ҳажмли темир идишлар ажратилиши режа қилинган. Аммо ўша сув идишларга сув олиб келиш қимматга тушаётгани сабаб бошқарма тасарруфидаги боғчаларга сув етказиб берувчи автомобиль ажратилишини сўраяпмиз. Агар шу режа амалга ошса, боғчаларимизга ўзимиз ичимлик суви етказиб берамиз», — дейди Асрор Алимардонов.
«Дарё» мухбирининг аниқлаштиришича, Қарши шаҳри ва туманидаги боғчалар ёз ойларида ҳафтада икки маротаба сув сотиб олади. Беш тонна сув тўкиш имкониятига эга автомобиллар 55-60 минг сўм эвазига сув келтириб бериши ҳисобга олинса, ҳар ҳафтада бир маротаба сув сотиб олинса ҳам битта боғча сув учун ойига 220-240 минг сўм харажат қилади.
«Боғчамизга ичимлик суви учун пул ажратилишини эшитамиз, аммо ўша пулни кўрмаймиз, — дейди исми ва қайси боғча раҳбари эканлиги сир қолишини сўраган мудира. — Сув учун ажратилган пулни бўлим бошлиқлари нақдлаштириб, чўнтагига уради. Ҳужжатларда эса боғчаларга пул ажратилгани ёзиб келинади».
Аниқланишича, вилоятдаги 384 та давлат боғчаси ичимлик сувини сотиб олади.
Изоҳ (0)