Ўзбекистонда 16 июнь соат 23:00 дан 17 июнь соат 23:00 га қадар 189 кишида коронавирус аниқланди. Бу бир кунда энг кўп касаллик аниқланиши бўйича учинчи натижа. 7 июнда 237 кишида, 16 июнда 230 кишида коронавирус аниқланганди. Янги ҳолатлардан сўнг Ўзбекистонда коронавирусга чалинганлар сони 5682 нафарга етди.
Янги касалланиш ҳолатлари
Янги касалланганларнинг- 169 нафари карантин муассасаларида
- 13 нафари аҳоли орасида (Тошкент шаҳрида — 5 нафар, Бухоро вилоятида — 3 нафар, Тошкент вилоятида — 3 нафар, Сурхондарё вилоятида — 2 нафар)
- 7 нафари халқаро юк ташувчи автомашина ҳайдовчилари орасида (уларнинг барчаси Тошкент вилоятида) аниқланган.
Аҳоли орасида энг кўп касалланиш ҳолати яна Тошкент шаҳрида қайд этилди. Пойтахтда беш кишида коронавирус аниқланган. 17 июнь куни Вазирлар Маҳкамасидаги департамент мудирларидан бирида коронавирус аниқлангани маълум бўлганди. Ҳозирда ҳукумат биноси қатъий карантинга олинган.
Тошкент шаҳрида коронавирус инфекцияси билан касалланганлар сони ошгани сабаб 17 июнь куни «Малика» савдо маркази, Юнусобод деҳқон бозори ва Учтепа туманидаги «Ўрикзор» савдо комплекси фаолияти тўхтатилди. Бир кун аввал «Малика» савдо маркази сотувчисида коронавирус аниқланганди. Шаҳардаги 71 та маҳалла «қизил» ҳудуд сифатида белгиланди (уларнинг рўйхати билан ушбу ҳаволада танишиб олишингиз мумкин). Бир ҳафта аввал Тошкентдаги 42 та маҳалла «қизил» эди.
Бухоро вилоятида 8 та янги ҳолат қайд этилган бўлиб, уларнинг 3 таси аҳоли орасида аниқланди. Бунгача Бухорода 10 июнь, 12 июнь, 14 июнь ва 16 июнда ҳам аҳоли орасида коронавирус аниқланганди.
Сурхондарё вилоятида 6 та янги ҳолат қайд этилиб, улардан 2 таси аҳоли орасида аниқланди. Сурхондарёга 14 июнь куни коронавирус қайтганди. Вилоятдаги ташкилотлардан бирининг ходими Тошкент шаҳрида хизмат сафаридан қайтгач ҳамкасбларига касалликни юқтиргани маълум бўлганди. У бемор билан мулоқотда бўлган 300 дан ортиқ одам карантинга олинганди. Бундан ташқари, 16 июндан бошлаб Термиз шаҳрига кириб-чиқиш вақтинча тўхтатилгани тўғрисида хабар берилганди. Музработ туманидаги тўйда белгиланган карантин қоидаларига риоя қилинмагани оқибатида 250 нафардан ортиқ фуқаро карантинга олинган.
Тошкент вилоятида халқаро юк машинаси ҳайдовчилари орасида 7 та, аҳоли орасида 3 та ҳолат қайд этилди.
Самарқанд вилоятида қайд этилган 5 та ҳолатнинг бари коронавирусга чалинганлар билан мулоқотда бўлиб, карантинга олинган фуқаролар орасида аниқланган. Аввалроқ Самарқанд туманида аза маросими чоғида коронавирус юқиши қайд этилгани маълум бўлганди.
Касалликдан даволаниш
17 июнь куни 35 нафар фуқаро коронавирусдан соғайди. Шундан 31 нафари Тошкент шаҳридаги, 4 нафари Самарқанд вилоятидаги тиббиёт муассасаларида шифо топди.Ҳозирда касаллик қайд этилган жами 5682 нафар бемордан 4131 нафари соғайиб, даволаниш кўрсаткичи 72 фоизни ташкил этмоқда. 13 июнь куни бу борадаги кўрсаткич 78 фоизгача ҳам чиққанди. Аммо сўнгги кунларда янги касалланганлар сони соғайганлар сонидан бир неча баробар кўп бўлмоқда. Мисол учун, 15 июнь куни янги касалланганлар соғайганлардан деярли 2,5 баробар, 16 июнь куни 3 баробар, 17 июнда эса деярли 5,5 баробар кўп бўлди.
Коронавирусдан даволанаётган беморлар сони Ўзбекистонда биринчи марта 1500 нафардан ошиб кетди. Айни вақтда шифохоналардаги 1532 нафар бемордан 1203 нафари Тошкентдаги тиббиёт муассасаларида даволанмоқда (Сирдарё вилоятидаги беморлар ҳам Тошкент шаҳрига ўтказилган). Қолган 329 нафар бемор мамлакатнинг 9 ҳудудидаги шифохоналарда даволанмоқда.
Қорақалпоғистонда 6, Андижонда 7, Сурхондарёда 15, Наманганда 21, Самарқандда 23, Хоразмда 24, Бухорода 27, Навоийда 51 ва Қашқадарёда 155 нафар бемор қолди. Жиззах ва Фарғона вилоятлари коронавирусдан холи ҳудуд бўлиб турибди.
Аҳволи оғир беморлар
Айни пайтда тиббиёт муассасаларида даволанаётган 1532 нафар бемордан 12 нафари оғир аҳволда. Бир сутка аввал аҳволи оғир беморлар сони 13 нафарни ташкил этаётганди.15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор вафот этди.
Изоҳ (0)