AQSh prezidenti Donald Tramp mamlakatda zo‘ravonlik va irqchilikka qarshi o‘tkazilayotgan ommaviy norozilik namoyishlari fonida politsiyani isloh qilish to‘g‘risidagi qarorni imzoladi, deb xabar beradi Oq uy matbuot xizmati.
Xususan, Tramp politsiyachilarga gumonlanuvchilarni qo‘lga olish vaqtida bo‘g‘ish usulidan (“insonni harakatsizlantirish uchun uning nafas olish qobiliyatini cheklaydigan jismoniy manyovr”) foydalanishni taqiqlab qo‘ydi. Bu kabi usuldan faqatgina politsiyachining hayoti xavf ostida qolganda foydalanish mumkin.
Shuningdek, Tramp politsiyachilar haqida, ular tomonidan sodir etilgan qonunbuzarliklar, xususan, haddan tashqari kuch ishlatish to‘g‘risidagi ma’lumotlar saqlanuvchi milliy bazani yaratish bo‘yicha ko‘rsatma bergan. Bundan tashqari, prezident politsiyachilarni mojarolarni tinch yo‘l bilan hal etishga o‘rgatadigan dasturlar uchun grant ajratish bo‘yicha topshiriq bergani ta’kidlanmoqda.
Qarorni imzolash marosimida Donald Tramp politsiyachilar tomonidan o‘ldirilgan insonlarning oilalariga hamdardlik bildirdi.
Eslatib o‘tamiz, may oyi oxirida afroamerikalik Jorj Floydni Minneapolisda politsiya xodimlari qo‘lga olgan va ko‘chada bir nafar xodim tomonidan tizza bilan bo‘g‘ib qiynoqqa solingan, yakunda Floyd kasalxonada vafot etgan. Uning o‘limi AQSh hamda Yevropada irqchilik va ijtimoiy tengsizlik muammolariga qarshi norozilik namoyishlarining boshlanishiga turtki bo‘ldi.
Izoh (0)