АҚШ президенти Дональд Трамп мамлакатда зўравонлик ва ирқчиликка қарши ўтказилаётган оммавий норозилик намойишлари фонида полицияни ислоҳ қилиш тўғрисидаги қарорни имзолади, деб хабар беради Оқ уй матбуот хизмати.
Хусусан, Трамп полициячиларга гумонланувчиларни қўлга олиш вақтида бўғиш усулидан («инсонни ҳаракатсизлантириш учун унинг нафас олиш қобилиятини чеклайдиган жисмоний манёвр») фойдаланишни тақиқлаб қўйди. Бу каби усулдан фақатгина полициячининг ҳаёти хавф остида қолганда фойдаланиш мумкин.
Шунингдек, Трамп полициячилар ҳақида, улар томонидан содир этилган қонунбузарликлар, хусусан, ҳаддан ташқари куч ишлатиш тўғрисидаги маълумотлар сақланувчи миллий базани яратиш бўйича кўрсатма берган. Бундан ташқари, президент полициячиларни можароларни тинч йўл билан ҳал этишга ўргатадиган дастурлар учун грант ажратиш бўйича топшириқ бергани таъкидланмоқда.
Қарорни имзолаш маросимида Дональд Трамп полициячилар томонидан ўлдирилган инсонларнинг оилаларига ҳамдардлик билдирди.
Эслатиб ўтамиз, май ойи охирида афроамерикалик Жорж Флойдни Миннеаполисда полиция ходимлари қўлга олган ва кўчада бир нафар ходим томонидан тизза билан бўғиб қийноққа солинган, якунда Флойд касалхонада вафот этган. Унинг ўлими АҚШ ҳамда Европада ирқчилик ва ижтимоий тенгсизлик муаммоларига қарши норозилик намойишларининг бошланишига туртки бўлди.
Изоҳ (0)