Xitoy va Hindiston o‘rtasidagi chegaraning munozarali hududida sodir bo‘lgan to‘qnashuv oqibatida 20 nafar hind askari halok bo‘ldi. Bu haqda Hindiston armiyasi bayonotiga tayanib, ANI News xabar berdi.
Mojaro 16-iyun kuni kechasi Himolaydagi Ladakx hududida sodir bo‘lgan. Tasdiqlanmagan ma’lumotlarga ko‘ra, har ikki tomon harbiy xizmatchilari o‘qotar qurollardan foydalanmagan — faqat tosh va mix qoqilgan metall tayoqlar. Harbiylar o‘rtasidagi jang 6 soatga yaqin davom etgan. Dastlab hind armiyasi 3 nafar qurbon haqida ma’lumot bergan. Keyinroq yana 17 kishi olingan tan jarohatlari oqibatida vafot etganini bildirgan.
Hindiston mazkur mojaroda Xitoyni ayblamoqda. Xitoy TIV esa o‘z navbatida hind harbiy xizmatchilar chegarani ikki marotaba noqonuniy kesib o‘tgani va xitoylik harbiylarga hujum qilganini bildirgan. Xitoy qurbonlar haqida ma’lumot bermagan. Ayrim manbalarning so‘zlariga ko‘ra, to‘qnashuv oqibatida 43 nafar xitoylik halok bo‘lgan yoki jarohat olgan.
BBC’ning yozishicha, bu hind-xitoy chegarasida so‘nggi 45 yil ichida qurbonlarga olib kelgan ilk to‘qnashuv hisoblanadi. Hindiston armiyasining ma’lum qilishicha, mojarodan so‘ng tomonlar Ladakxdagi kuchlarini olib chiqib ketgan.
Ma’lumot uchun, Ladakx orqali Hindiston va Xitoy o‘rtasidagi demarkatsiya liniyasi o‘tgan. Himolayda chegaraga oid hal etilmagan masalalar sabab 1962-yilda ikki mamlakat o‘rtasida chegara urushi yuzaga kelib, 2 oy davom etgandi. Shunday buyon chegarada yirik mojaro kuzatilmagan edi.
Izoh (0)