Rossiya prezidenti Vladimir Putin AQShda afroamerikalik Jorj Floydning politsiya tomonidan o‘ldirilishi oqibatida boshlangan va davom etayotgan ommaviy norozilik namoyishlari haqida o‘z fikrlarini bayon qildi. Bu haqda “RIA Novosti” xabar bermoqda.
“AQShda va boshqa mamlakatlarda sodir bo‘layotgan voqealarga ehtiyotkorlik bilan munosabat bildirishga yoki umuman izoh bermaslikka harakat qilaman. U yerda sodir bo‘layotgan voqealar ichki chuqur inqirozlar boshlanganini anglatadi. Aslini olganda, bunday holat anchadan buyon kuzatilmoqda. AQShda yangi prezident saylovlarda demokratik yo‘llar bilan mutlaq g‘olib chiqqanidan keyin yutqazgan tomon uning ushbu o‘ringa munosib emasligini namoyish qilishga urinmoqda”, — degan Putin “Moskva. Kreml. Putin” dasturiga bergan intervyusida.
Rossiya yetakchisini AQShdagi ayrim shtatlar gubernatorlarining Donald Tramp farmoyishiga munosabati hayron qoldirgan.
“Demokratiya nima? Bu xalq boshqaruvi va bu eng to‘g‘ri yo‘l. Biroq xalq oliy boshqaruv organlarida o‘tiradiganlarni saylasa va rahbarlar xalq irodasini ifoda etsa, ijro organi mamlakat aholisining manfaatlarini himoya qilishi lozim. AQShda nima bo‘lyapti? Tramp ishni qanday o‘nglash haqida gapirmoqda, shtatlar gubernatorlari esa bunga parvo qilmayapti”, — degan Putin.
AQShdagi shaharlarda davom etayotgan norozilik namoyishlari va tartibsizliklar Minneapolisda afroamerikalik Jorj Floydning politsiyachilar tomonidan o‘ldirilishi oqibatida boshlangan.
Norozilik namoyishlari boshlanganidan keyin Donald Tramp shtatlar gubernatorlaridan Milliy gvardiyani tartibsizliklarni bostirishga jalb etishni talab qilgan, ammo hududlar rahbarlari tartibsizliklarni harbiylar ko‘magisiz ham to‘xtata olishini ma’lum qilgan.
Izoh (0)