Россия президенти Владимир Путин АҚШда афроамерикалик Жорж Флойднинг полиция томонидан ўлдирилиши оқибатида бошланган ва давом этаётган оммавий норозилик намойишлари ҳақида ўз фикрларини баён қилди. Бу ҳақда «РИА Новости» хабар бермоқда.
«АҚШда ва бошқа мамлакатларда содир бўлаётган воқеаларга эҳтиёткорлик билан муносабат билдиришга ёки умуман изоҳ бермасликка ҳаракат қиламан. У ерда содир бўлаётган воқеалар ички чуқур инқирозлар бошланганини англатади. Аслини олганда, бундай ҳолат анчадан буён кузатилмоқда. АҚШда янги президент сайловларда демократик йўллар билан мутлақ ғолиб чиққанидан кейин ютқазган томон унинг ушбу ўринга муносиб эмаслигини намойиш қилишга уринмоқда», — деган Путин «Москва. Кремль. Путин» дастурига берган интервьюсида.
Россия етакчисини АҚШдаги айрим штатлар губернаторларининг Дональд Трамп фармойишига муносабати ҳайрон қолдирган.
«Демократия нима? Бу халқ бошқаруви ва бу энг тўғри йўл. Бироқ халқ олий бошқарув органларида ўтирадиганларни сайласа ва раҳбарлар халқ иродасини ифода этса, ижро органи мамлакат аҳолисининг манфаатларини ҳимоя қилиши лозим. АҚШда нима бўляпти? Трамп ишни қандай ўнглаш ҳақида гапирмоқда, штатлар губернаторлари эса бунга парво қилмаяпти», — деган Путин.
АҚШдаги шаҳарларда давом этаётган норозилик намойишлари ва тартибсизликлар Миннеаполисда афроамерикалик Жорж Флойднинг полициячилар томонидан ўлдирилиши оқибатида бошланган.
Норозилик намойишлари бошланганидан кейин Дональд Трамп штатлар губернаторларидан Миллий гвардияни тартибсизликларни бостиришга жалб этишни талаб қилган, аммо ҳудудлар раҳбарлари тартибсизликларни ҳарбийлар кўмагисиз ҳам тўхтата олишини маълум қилган.