AQShdagi qurilish materiallari ishlab chiqaruvchi Acme Brick kompaniyasi mamlakatdagi norozilik namoyishlarini qo‘llab-quvvatlaganlikda gumon qilinmoqda. Bu haqda Bloomberg xabar berdi.
Qayd etilishicha, iyun boshida ijtimoiy tarmoqlarda kompaniyaning norozilik bildirayotgan odamlarga g‘isht yetkazib berishga tayyorligi haqidagi xabarnomalar tarqalgan.
Acme Brick korxonasi Texasda joylashgan. Kompaniyaga 1891-yilda asos solingan va XX asr o‘rtalariga kelib ushbu korxona AQShdagi eng yirik g‘isht ishlab chiqaruvchilardan biri hisoblangan. 2000-yilda Acme Brick’ni milliarder Uorren Baffettga tegishli Berkshire Hathaway holdingi xarid qilgan.
1-iyunda Acme Brick’ning marketing masalalari bo‘yicha direktori Britt Stouks Twitter’da kompaniya nomiga shikoyatlar, ayblovlar e’lon qilingani haqida gapirgan. Ijtimoiy tarmoqdagi foydalanuvchi Acme Brick logotipi tushirilgan poddonlardagi g‘ishtlar suratini e’lon qilib, kompaniyaning norozilik ishtirokchilari uchun Dallas shahri yaqinidagi Frisko ko‘chasida atayin qoldirganini taxmin qilgandi.
Stouks buyurtmani taftish qilib, g‘ishtlar partiyasining uy egalari assotsiatsiyasi tomonidan devorlarni ta’mirlash uchun yetkazib berilganini aniqlagan. Ushbu ma’lumotni mahalliy politsiya ham tasdiqlagan.
Frisco PD has responded and investigated the report of bricks near where a planned protest is to be held. It was determined that the bricks were part of a planned HOA construction project and with permission they have been removed to be returned at a later time. pic.twitter.com/jGL1AkGy5z
— Frisco Police (@FriscoPD) June 1, 2020
Bloomberg’ning yozishicha, ushbu rasmiy axborotlarga qaramay internetdagi mish-mishlar aslo kamaymayapti. Twitter’da bu kabi mazmundagi xabarlar ko‘payib bormoqda, keyinchalik Facebook, YouTube, TikTok’da hamda bir qator ommaviy axborot vositalarida ham g‘ishtlar haqidagi xabarlar tarqalgan. 2-iyunda Fox News telekanali norozilik namoyishlari o‘tkaziladigan joylarda sirli ravishda paydo bo‘layotgan g‘ishtlar uyumi haqidagi videolavhani efitga bergan.
The Intercept nashrining yozishicha, 3-iyunda Oq uy Twitter-akkauntida “Antifa” harakati va “professional anarxistlar”ning norozilik namoyishlari vaqtida zo‘ravonlikni kuchaytirish maqsadida odamlarga g‘ishtlar hamda qurollar yetkazib berilayotgani haqidagi matn va video yuklangan. Oradan ma’lum vaqt o‘tgach ko‘rishlar soni bir milliondan oshgan ushbu post akkauntdan o‘chirib tashlangan.
Fitna nazariyasi tarafdori bo‘lgan amerikalik jurnalist Aleks Jons 2-iyun kuni o‘z radio-shousida ushbu voqealarga Bill Geytsning aloqasi borligini ma’lum qilgan. Uning fikricha, konspirologlar Geytsni koronavirusga qarshi vaksinatsiya qilish yo‘li bilan odamlarga chip o‘rnatishga urinayotganlikda ayblagan.
“Xonimlar va janoblar, biz AQShdagi 20 dan ziyod shaharlarga kim g‘isht yetkazib berayotganini aniqladik. Bu Acme Brick korxonasi, u Berkshire Hathaway va Bill Geytsga qarashli”, — degan Jons.
Geyts Berkshire direktorlar kengashi tarkibidan chiqqanini 2020-yilning mart oyida e’lon qilgandi.
O‘z navbatida Berkshire Hathaway vakillari Bloomberg’ning bu boradagi so‘roviga javob qaytarmagan. Acme Brick esa ayblovlarni inkor etmoqda.
“Acme Brick qurilish ishlari bilan shug‘ullanadi va buzish ishlariga aralashmaydi”, — deya bayonot bergan kompaniya o‘z rasmiy saytida.
Shuningdek, kompaniya zo‘ravonlikka targ‘ibot qilish maqsadida hech qanday ishni amalga oshirmaganini qayd etgan. Shuningdek, bayonotda Baffett ham, Geyts ham, Berkshire holdingi direktorlar kengashidagi hech bir inson g‘ishtlarda noqonuniy foydalanish ishiga aloqador emasligi aytib o‘tgan.
AQShda irqchilik va huquq-tartibot idoralariga qarshi boshlangan norozilik namoyishlari ikki haftadan buyon davom etmoqda. Namoyishlarning boshlanishiga afroamerikalik Jorj Floydning Minnesota shtatidagi Minneapolis shahrida politsiyachilar tomonidan qiynoqqa solinishi va kasalxonada vafot etishi sabab bo‘lgan. O‘nlab shaharlarda namoyishlar ketidan ko‘chalardagi tartibsizliklar, do‘konlarning o‘marib ketilishi, vandalizm va binolarga o‘t qo‘yish holatlari kuzatildi.
Izoh (0)