Toshkent viloyati hokimi Ohangaron, Quyi Chirchiq, Piskent tumani hokimlarini ogohlantirdi. Qurilish bo‘yicha mansabdorlarga hayfsan berdi

Nurafshon shahrida Toshkent viloyati hokimi Rustam Xolmatov raisligida hududning ijtimoiy-iqtisodiy rivojlantirishning dolzarb masalalariga bag‘ishlab o‘tkazilgan onlayn muloqotda qishloq xo‘jaligi hamda qurilish sohasidagi kamchiliklar keskin tanqid qilindi. Bu haqda Toshkent viloyati axborot xizmati xabar qilgan.

Yig‘ilishda g‘alla, pilla, paxta, meva-sabzavot yetishtirish borasida hosilni nest-nobud qilmay jamg‘arish, qayta ishlash, zarur agrotexnik tadbirlar orqali daladagi ekinlarni zarurkunandalardan asrash bo‘yicha zarur choralarni ko‘rish yuzasidan ko‘rsatmalar berildi.

Bu borada sustkashlikka yo‘l qo‘ygani uchun Ohangaron, Quyi Chirchiq, Piskent tumani hokimlari ogohlantirildi. Ularga vaziyatni o‘nglash bo‘yicha qo‘shimcha topshiriq va ko‘rsatmalar berilgan.

Shuningdek, hokim viloyatda qurilish sohasida amalga oshirilayotgan ishlar haqida ham tanqidiy fikr bildirgan. Hali 2018, 2019-yilgi dasturlar asosida qurib, topshirilishi mo‘ljallangan obyektlarning foydalanishga topshirilmagani keskin tanqid qilgan.

Viloyat hokimi Bo‘stonliq tumanida 2018-yilgi dasturlar bo‘yicha qurib foydalanishga topshirilishi kerak bo‘lgan 42 ta, Zangiotada 48 ta, Qibrayda 48 ta, Yangiyo‘l tumanida 72 ta uylarning qurilishi hanuzgacha yakuniga yetkazilmagani, shuningdek, 2019-yilgi dasturlar bo‘yicha qurilishi rejalashtirilgan ayrim uylarning topshirilishi kechikayotgani haqida gapirgan.

Jumladan, Nurafshonda 90 ta, Chirchiqda 210 ta, Toshkent tumanida 108 ta va Qibray tumanida 138 ta foydalanishga topshirilmagan obyektlar borligi aytildi.