Toshkent viloyati Bo‘ka tumani hokim o‘rinbosari xalq ta’limi muassasalari faoliyatiga asossiz aralashgani, pedagog kadrlarning sha’ni va qadr-qimmatini kamsitib, ularni kasbiy faoliyati bilan bog‘liq bo‘lmagan ishlarga jalb qilgani uchun 22,3 million so‘m jarimaga tortildi. Bu haqda Xalq ta’limi vazirligi xabar berdi.
Foto: Xalq ta’limi vazirligi
Ma’lumotlarga ko‘ra, Bo‘ka tumani hokimining o‘rinbosari Anvar Xonto‘rayev tomonidan tumanda joylashgan ta’lim muassasalari rahbarlariga obodonlashtirish hamda tomorqa ishlari bo‘yicha xatlov o‘tkazish kabi topshiriqlar berilgan.
Xususan, Xonto‘rayev 19-aprel kuni Vazirlar Mahkamasining 2020-yil 23-martdagi 176-sonli qaroriga zid ravishda tumandagi 12-sonli umumta’lim maktabida 53 nafar ta’lim muassasasi rahbari va mahalla faollariga yig‘ilish o‘tkazgan. Unda 12-maktab direktori M.Hakimovaning o‘z vaqtida tomorqa bo‘yicha aholini xatlov qilmaganligi uchun uning kasbiy faoliyatiga asossiz aralashib, unga tazyiq o‘tkazgan.
Shuningdek, u maktab direktoridan tuman hokimi nomiga tushuntirish xati va 20-aprel kunidan ishdan bo‘shash to‘g‘risida arizasini olgan.
Bundan tashqari, 6—7-may kunlari Xonto‘rayev tumanda faoliyat yuritayotgan 15, 16, 18, 24, 50-umumta’lim maktablari direktorlariga tazyiq o‘tkazib, tuman markazidagi “Yoshlar maydoni”ga direktorlar va xo‘jalik ishlari bo‘yicha o‘rinbosarlarini, ya’ni 25 kishini maydonda o‘sgan o‘tlarni o‘rish kabi majburiy mehnatga jalb qilgan.
Avvalroq Samarqand viloyatining Narpay tumani hokimi ro‘zador o‘qituvchilarni hojatxona tozalashga jalb qilgani haqida xabar berilgandi.
