Qashqadaryo viloyati Koson tumanida bir fuqaroga gaz to‘pponchadan o‘q uzib, qurol qo‘ndog‘i bilan uning boshiga urib, jarohat yetkazgan shaxs qo‘lga olindi. Bu haqda Tergov departamenti xabar berdi.
Ma’lum qilinishicha, 2020-yilning 7-iyun kuni soat 14:00 da Qashqadaryo viloyati Koson tumanida yashovchi fuqaro H.P. jamiyatda yurish-turish qoidalarini qasddan mensimasdan, S.R.ning yashash uyi oldida hech bir sababsiz “nega menga bunday qaraysan?”, deb uning oldiga borgan va haqorat qilgan.
H.P. o‘zining bezorilik harakatlarini davom ettirib, yonida bo‘lgan “Makarov” ko‘rinishidagi “MR-654K Sal.4,5 mm” gaz to‘pponchasi qo‘llash bilan S.R.ni qo‘rqitgan. Shundan so‘ng, u quroldan foydalanib, S.R.ga qarata bir necha marotaba o‘q uzgan va uning o‘ng quloq sohasiga tan jarohati yetkazgan. Keyin esa H.P. to‘pponchaning qo‘ndoq qismi bilan S.R.ning bosh sohasiga bir necha marotaba urib, tan jarohatlari yetkazgan.
Holat yuzasidan Koson tumani IIB huzuridagi Tergov bo‘limi tomonidan H.P.ga nisbatan O‘zbekiston Respublikasi Jinoyat kodeksining 277-moddasi 2-qismi “v” bandi (Bezorilik) bilan jinoyat ishi qo‘zg‘atilgan.
Dastlabki tergov jarayonida H.P. gumon qilinuvchi tariqasida jalb qilinib, protsessual tartibda ushlangan. Hozirda tergov harakatlari davom ettirilmoqda.
Izoh (0)