Қашқадарё вилояти Косон туманида бир фуқарога газ тўппончадан ўқ узиб, қурол қўндоғи билан унинг бошига уриб, жароҳат етказган шахс қўлга олинди. Бу ҳақда Тергов департаменти хабар берди.
Маълум қилинишича, 2020 йилнинг 7 июнь куни соат 14:00 да Қашқадарё вилояти Косон туманида яшовчи фуқаро Ҳ.П. жамиятда юриш-туриш қоидаларини қасддан менсимасдан, С.Р.нинг яшаш уйи олдида ҳеч бир сабабсиз «нега менга бундай қарайсан?», деб унинг олдига борган ва ҳақорат қилган.
Ҳ.П. ўзининг безорилик ҳаракатларини давом эттириб, ёнида бўлган «Макаров» кўринишидаги «МР-654К Cal.4,5 мм» газ тўппончаси қўллаш билан С.Р.ни қўрқитган. Шундан сўнг, у қуролдан фойдаланиб, С.Р.га қарата бир неча маротаба ўқ узган ва унинг ўнг қулоқ соҳасига тан жароҳати етказган. Кейин эса Ҳ.П. тўппончанинг қўндоқ қисми билан С.Р.нинг бош соҳасига бир неча маротаба уриб, тан жароҳатлари етказган.
Ҳолат юзасидан Косон тумани ИИБ ҳузуридаги Тергов бўлими томонидан Ҳ.П.га нисбатан Ўзбекистон Республикаси Жиноят кодексининг 277-моддаси 2-қисми «в» банди (Безорилик) билан жиноят иши қўзғатилган.
Дастлабки тергов жараёнида Ҳ.П. гумон қилинувчи тариқасида жалб қилиниб, процессуал тартибда ушланган. Ҳозирда тергов ҳаракатлари давом эттирилмоқда.
Изоҳ (0)