Amerikaning Apple korporatsiyasi irqiy tenglik va adolat g‘oyalarini ilgari suruvchi, tanasining rangi oq bo‘lmagan insonlar imkoniyatini ta’lim, iqtisodiyot va jinoiy odil sudlov borasida kengaytirishga mo‘ljallangan dasturni ishga tushirmoqda Bu haqda kompaniya rahbari Tim Kuk o‘zining Twitter’dagi sahifasi orqali ma’lum qildi.
Kukning so‘zlariga ko‘ra, kompaniya yangi tashabbus uchun 100 million dollar ajratish niyatida.
Bundan tashqari, Apple qora tanlilar rahbarlik qiladigan kompaniyalar bilan hamkorlikni kengaytirish va biznes sheriklar orasida afroamerikalik vakillarni oshirishni rejalashtirmoqda.
The unfinished work of racial justice and equality call us all to account. Things must change, and Apple's committed to being a force for that change. Today, I'm proud to announce Apple’s Racial Equity and Justice Initiative, with a $100 million commitment. pic.twitter.com/AoYafq2xlp
— Tim Cook (@tim_cook) June 11, 2020
Shuningdek, kompaniya, asosan, afroamerikalik talabalar tahsil oladigan kollej va universitetlar bilan hamkorlikni yo‘lga qo‘yish va korporatsiyaning o‘zida milliy ozchiliklar vakillarining sonini ko‘paytirish bo‘yicha qo‘shimcha choralarni ko‘radi.
Irqiy tenglik va adolat dasturiga Apple’ning atrof-muhit, siyosat va ijtimoiy tashabbus bo‘yicha vitse-prezidenti Liza Jekson rahbarlik qiladi.
Avvalroq Amazon kompaniyasi AQSh politsiyasiga o‘zining yuzni tanish texnologiyasidan foydalanishni bir yilga taqiqlab qo‘ygani haqida xabar berilgandi.
Eslatib o‘tamiz, Minneapolis shahri politsiyasi vakili 25-may kuni 46 yoshli afroamerikalik Jorj Floydni qo‘lga olish chog‘ida uni tutib, yerga yotqizgan va tizzasi bilan bo‘ynini bosgan. Politsiyachi uni shu tariqa uzoq vaqt ushlab turishi Jorj Floydning o‘limiga sabab bo‘lgan. Holat aks etgan video ijtimoiy tarmoqlarda tarqalgach, AQShning turli hududlarida norozilik namoyishlari boshlangan. AQShning 25 ta shahrida ommaviy noroziliklar sabab komendantlik soati e’lon qilingan edi.
Izoh (0)