Американинг Apple корпорацияси ирқий тенглик ва адолат ғояларини илгари сурувчи, танасининг ранги оқ бўлмаган инсонлар имкониятини таълим, иқтисодиёт ва жиноий одил судлов борасида кенгайтиришга мўлжалланган дастурни ишга туширмоқда Бу ҳақда компания раҳбари Тим Кук ўзининг Twitter’даги саҳифаси орқали маълум қилди.
Кукнинг сўзларига кўра, компания янги ташаббус учун 100 миллион доллар ажратиш ниятида.
Бундан ташқари, Apple қора танлилар раҳбарлик қиладиган компаниялар билан ҳамкорликни кенгайтириш ва бизнес шериклар орасида афроамерикалик вакилларни оширишни режалаштирмоқда.
The unfinished work of racial justice and equality call us all to account. Things must change, and Apple's committed to being a force for that change. Today, I'm proud to announce Apple’s Racial Equity and Justice Initiative, with a $100 million commitment. pic.twitter.com/AoYafq2xlp
— Tim Cook (@tim_cook) June 11, 2020
Шунингдек, компания, асосан, афроамерикалик талабалар таҳсил оладиган коллеж ва университетлар билан ҳамкорликни йўлга қўйиш ва корпорациянинг ўзида миллий озчиликлар вакилларининг сонини кўпайтириш бўйича қўшимча чораларни кўради.
Ирқий тенглик ва адолат дастурига Apple’нинг атроф-муҳит, сиёсат ва ижтимоий ташаббус бўйича вице-президенти Лиза Жексон раҳбарлик қилади.
Аввалроқ Amazon компанияси АҚШ полициясига ўзининг юзни таниш технологиясидан фойдаланишни бир йилга тақиқлаб қўйгани ҳақида хабар берилганди.
Эслатиб ўтамиз, Миннеаполис шаҳри полицияси вакили 25 май куни 46 ёшли афроамерикалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинган эди.