Фарғона вилояти ҳокимлиги Сўх туманига озиқ-овқат маҳсулотлари, қурилиш материаллари ва бошқа кўплаб аҳоли кундалик ҳаёти учун зарур бўлган буюмлар ортилган хайрия карвони юборди. Бу ҳақда вилоят ҳокимлиги матбуот хизмати хабар бермоқда.
Қайд этилишича, бугунги кунда тумандаги мавжуд муаммоларни бартараф этиш, аҳоли турмуш даражасини янада яхшилаш борасида кўплаб таклифлар асосида дастур ишлаб чиқилди. 2020—2022 йилларда Сўх туманини комплекс ривожлантиришга 500 миллиард сўм маблағ йўналтириш кўзда тутилган.
Хусусан, «Фарғона ҳудудий электр тармоқлари корхонаси» акциядорлик жамияти 16 та трансформатор, 80 дона бетон устунлар, 70 километрдан ортиқ электр узатиш кабеллари каби 2 миллиард 251 миллион сўмликдан ортиқ жиҳозларни туман аҳолиси учун тақдим қилди.
«Ҳудудгаз Фарғона» масъулияти чекланган жамияти эса 11 та махсус машинада суюлтирилган газ баллонларини, Ўзбекистон туманидаги «Беруний» маҳалла фуқаролар йиғини аҳли эса 5 тонна ун маҳсулотини сўхликларга беминнат ёрдам сифатида юборди.
Вилоят соғлиқни сақлаш бошқармаси томонидан замонавий тиббиёт жиҳозлари ажратилди.
Шунингдек, вилоятдаги бозорлар томонидан Сўх туманида арзонлаштирилган маҳсулотлар савдоси йўлга қўйилмоқда.
Аввалроқ 230 нафар сўхлик Tashkent City’даги қурилиш ишларида қатнашиш учун олиб келинаётгани хабар берилган эди.
Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳолиси ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққанди.
Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди. Шунингдек, Абдулла Арипов Қирғизистон расмийлари билан учрашиб, ҳодиса юзасидан музокара олиб борди. Сўх туманига янги ҳоким ва ички ишлар бўлимига янги раҳбар тайинланди.
Изоҳ (0)