Koronavirus pandemiyasi tarqalishiga yo‘l qo‘ymaslik maqsadida O‘zbekistonda joriy etilgan karantin choralari sabab, 2020-yilgi muddatli harbiy xizmatga ketish uchun saralangan yoshlarning armiyaga yuborilishi kechiktirilgan edi. Shimoli-g‘arbiy harbiy okrug matbuot xizmatining ma’lum qilishicha, 9-iyun kuni chaqiriluvchilarni muddatli harbiy xizmatga yuborish yana boshlangan.
Ta’kidlanishicha, mamlakat bo‘ylab koronavirus pandemiyasi tufayli o‘rnatilgan karantin choralarining yumshatilishi natijasida shu kunlarda armiya saflarini to‘ldirishga ulgurmagan yoshlar muddatli harbiy xizmatga yo‘l olmoqda.
Xususan, 9-iyun kuni Qoraqalpog‘iston Respublikasi va Xorazm viloyati mudofaa ishlari boshqarmalari tomonidan 500 nafarga yaqin yoshlar muddatli harbiy xizmatni o‘tash uchun “O‘zbekiston temiryo‘llari” AJ tomonidan reysga qo‘yilgan maxsus poyezdlarda jo‘nab ketdi.
Harbiy xizmatga ketishdan bir necha kun oldin esa chaqiriluvchilar viloyat Mudofaa ishlari boshqarmalarida tashkil etilgan Harbiy-tibbiy komissiya ko‘rigidan o‘tgan.
Avvalroq harbiy xizmatni o‘tash yoshiga yetgan fuqarolar karantindan so‘ng xizmatga chaqirilishi mumkinligi to‘g‘risida xabar berilgandi.
Mavzuga doir: Mudofaa vazirligi: “Bir oylik xizmatga pulini to‘lab qo‘ygan fuqarolarning pullari qaytarib berilmaydi”
Izoh (0)