Armaniston prezidenti Armen Sarkisyan 8-iyun kuni mamlakat Qurolli kuchlari bosh shtabi boshlig‘i Artak Davtyan, Milliy xavfsizlik xizmati direktori Eduard Martirosyan va politsiya boshlig‘i Arman Sarkisyanni iste’foga chiqardi, deb xabar beradi “Novosti Armeniya” agentligi.
Hukumat rahbari kuch tuzilmalarining yuqori martabali amaldorlari nima sababdan ishdan olinganiga aniqlik kiritmagan. Bunga qadar mamlakat bosh vaziri Pashinyan koronavirus pandemiyasi vaqtida favqulodda holat rejimini yaxshi ta’minlay olmagani sabab politsiyani tanqid qilgandi.
Deutsche Welle’ning ta’kidlashicha, Armaniston MXX sobiq boshlig‘i Martirosyan “tizimning odami bo‘lmagan” Argisht Kyaramyanni o‘ziga o‘rinbosar qilib tayinlashganidan norozi bo‘lgan. Ma’lumotlarga ko‘ra, Martirosyan iste’foga chiqish arizasini o‘z xohishi bilan yozgan.
Bosh shtab boshlig‘i Davtyanning ishdan bo‘shatilishi o‘g‘lining to‘yi sabab yuzaga kelgan mojaroga bog‘lanmoqda. Generalning uyida karantin cheklovlari sabab ommaviy tadbirlar taqiqlanganiga qaramay, 100 dan ortiq odam to‘plangan. Tantanali marosimni Armaniston bosh vaziri o‘rinbosari, favqulodda holatlar rejimi komendanti Tigran Avinyan bilan kelgan politsiyachilar to‘xtatgan. Davtyanning o‘zi shaxsiy hayotga haqqi borligini ma’lum qilib, OAVdan oilasini tinch qo‘yishni so‘ragan.
Armaniston prezidenti mamlakat kuch tuzilmalari rahbarligiga Pashinyan taklif etgan yangi nomzodlarni tasdiqlab ulgurdi. Shunday qilib, Armaniston Qurolli kuchlari bosh shtabi boshlig‘i etib general Onik Gasparyan, MXX direktori etib polkovnik Argisht Kyaramyan tayinlangan. Politsiyaga esa Vage Kazaryan rahbarlik qiladi.
Avvalroq Armanistonda koronavirus bilan bog‘liq og‘ir vaziyat yuzaga kelgani haqida xabar berilgandi. Bosh vazir Nikol Pashinyanning o‘zi va oila a’zolarida ham koronavirus aniqlangan.
Izoh (0)