Арманистон президенти Армен Саркисян 8 июнь куни мамлакат Қуролли кучлари бош штаби бошлиғи Артак Давтян, Миллий хавфсизлик хизмати директори Eduард Мартиросян ва полиция бошлиғи Арман Саркисянни истеъфога чиқарди, деб хабар беради «Новости Армения» агентлиги.
Ҳукумат раҳбари куч тузилмаларининг юқори мартабали амалдорлари нима сабабдан ишдан олинганига аниқлик киритмаган. Бунга қадар мамлакат бош вазири Пашинян коронавирус пандемияси вақтида фавқулодда ҳолат режимини яхши таъминлай олмагани сабаб полицияни танқид қилганди.
Deutsche Welle’нинг таъкидлашича, Арманистон МХХ собиқ бошлиғи Мартиросян «тизимнинг одами бўлмаган» Аргишт Кярамянни ўзига ўринбосар қилиб тайинлашганидан норози бўлган. Маълумотларга кўра, Мартиросян истеъфога чиқиш аризасини ўз хоҳиши билан ёзган.
Бош штаб бошлиғи Давтяннинг ишдан бўшатилиши ўғлининг тўйи сабаб юзага келган можарога боғланмоқда. Генералнинг уйида карантин чекловлари сабаб оммавий тадбирлар тақиқланганига қарамай, 100 дан ортиқ одам тўпланган. Тантанали маросимни Арманистон бош вазири ўринбосари, фавқулодда ҳолатлар режими коменданти Тигран Авинян билан келган полициячилар тўхтатган. Давтяннинг ўзи шахсий ҳаётга ҳаққи борлигини маълум қилиб, ОАВдан оиласини тинч қўйишни сўраган.
Арманистон президенти мамлакат куч тузилмалари раҳбарлигига Пашинян таклиф этган янги номзодларни тасдиқлаб улгурди. Шундай қилиб, Арманистон Қуролли кучлари бош штаби бошлиғи этиб генерал Оник Гаспарян, МХХ директори этиб полковник Аргишт Кярамян тайинланган. Полицияга эса Ваге Казарян раҳбарлик қилади.
Аввалроқ Арманистонда коронавирус билан боғлиқ оғир вазият юзага келгани ҳақида хабар берилганди. Бош вазир Никол Пашиняннинг ўзи ва оила аъзоларида ҳам коронавирус аниқланган.
Изоҳ (0)