Neymarning shaxsini tasdiqlovchi hujjati o‘g‘irlandi

PSJ hujumchisi Neymarning Braziliya fuqarosi ekanini tasdiqlovchi guvohnomasi o‘g‘irlangan, deya xabar bermoqda UOL.

Manbada aytilishicha, jinoyatchi koronavirus pandemiyasi tufayli yuzaga kelgan inqiroz paytida ishchilarga davlat tomonidan beriladigan yordam pulini olish maqsadida futbolchining ma’lumotlarini ishlatishga uringan. Ta’kidlanishicha, Neymarning vakillari matbuot ular bilan bog‘lanmaguncha voqea haqida bilmagan.

Ma’lumot uchun, PSJ Neymarni “Barselona”dan 222 million yevroga sotib olgan. Bu futbol tarixidagi eng qimmat transfer hisoblanadi.

Neymar koronavirus pandemiyasi sabab muddatdan oldin yakunlangan Fransiya chempionatida 13 ta o‘yinda maydonga tushib, o‘z hisobiga 13 ta gol va 6 ta assist yozdirib qo‘ydi.