Qashqadaryo viloyatining Nishon tumani hokimi topshirig‘iga ko‘ra, nogironlarga mo‘ljallangan uyni ta’mirlagan quruvchi 162 million so‘m pulini ololmayotganini aytmoqda. Bu haqda “Daryo”ga shikoyat qilgan tadbirkor Muhammad Rajabovning aytishicha, hokim talab qilgan ish bitganiga ikki yildan oshgan bo‘lsa-da, hokimlik haligacha va’dasini bajarmagan.
“Nishon tumanining oldingi hokimi Asror Jo‘rayev va tuman Xalq qabulxonasi rahbari, ayni kunda viloyat Xalq qabulxonasi boshlig‘i bo‘lib ishlab kelayotgan Faxriddin Jumayevlarning topshirig‘iga ko‘ra, tumandagi ikki qavatli 12 xonadonli uyni 306 million so‘m evaziga qayta ta’mirlab bergandim. O‘sha paytda pulning yarmini berishgandi. Ammo va’da qilingan pulning 162 million so‘mi haligacha to‘lab berilmayapti”, — deydi “Navo tong yog‘dusi” MChJ qurilish tashkiloti rahbari Muhammad Rajabov.
Quruvchi tadbirkorning ma’lumot berishicha, 2017-yil Nishon tumani hokimi Asror Jo‘rayev tumanda nogironligi bo‘lgan fuqarolarni uy bilan ta’minlashi lozimligini aytib, tadbirkordan yordam berishini so‘ragan. Hokim topshirig‘iga ko‘ra, ish boshlagan quruvchi uy ta’mirini qisqa muddatda yakunlagan. 2017-yil dekabr oyida esa uy o‘z egalariga tantanali ravishda topshirilgan.
“Qurilish yakunlangach, hokim va prokuror tez orada pulimni o‘tkazib berishlarini aytdi. Ammo kutilmaganda hokim ham prokuror ham ishdan ketdi. Tuman Xalq qabulxonasi boshlig‘i esa viloyatga ishga o‘tib ketdi. Hozirgi hokim esa senga beradigan pulim yo‘q, men sen bilan kelishmaganman deyapti, deydi quruvchi tashkilot rahbari.
Mazkur masala yuzasidan “Daryo” muxbiri bilan suhbatlashgan Nishon tumani hokimi Muxtor Hayitmurodov muammo tez orada yechilishini, buning uchun esa tadbirkor qancha mablag‘ sarflab nima ishlar qilganini isbotlovchi hujjatlar taqdim qilishi lozimligini aytdi.
“Barcha hujjatlarimni takroran ko‘rsatdim, hokimiyat topshirig‘i bilan qurilish ishlarini yana bir bor ko‘zdan kechirgan mutaxassislar men aytgan mablag‘imdan ko‘proq pul sarflanganini ma’lum qilishdi”, — deydi Muhammad Rajabov.
Qurilish tashkiloti rahbarining shikoyat qilishicha, mazkur uy ta’mirlashi uning dastlabki ishi bo‘lgan.
“Qurilish tashkilotini tuzib, endi ish boshlagan paytim shunaqa holatga to‘g‘ri keldi. O‘sha paytda aytilgan ishni bajarish uchun ikkita mashinamni sotgandim. Ammo bugungi kunga kelib, hatto xarajatimni ham qoplab berishmayapti”, — deydi qurilish tashkiloti rahbari.
Qurilish tashkiloti rahbarining aytishicha, tuman hokimlari nogironligi bor fuqarolar uchun mo‘ljallangan uyni, odatda, tadbirkorlar hisobidan ta’mirlaydi yoki quradi.
“Ko‘pchilik qurilish tashkiloti rahbarlari bu ishni olib bekor qilding, deb aytishgandi. Keyin bilsam, hokimlar bunday ishlarni tadbirkorlar hisobidan bitkazishar ekan va umuman pul berishmas ekan”, — deydi Muhammad Rajabov.
Muxtor Hayitmurodovning qurilish masalalari bo‘yicha o‘rinbosarining ma’lumot berishicha, quruvchi tadbirkorning hokimlik bilan tuzgan shartnomasi yo‘q. Shu sababdan ham uning puli to‘lab berilmagan.
“Quruvchi ishni boshlashdan oldin hokimiyat bilan shartnoma tuzmagan, hokimning og‘zaki topshirig‘i bilan ish bajarib ketavergan. Bugungi kunga kelib esa qiyin ahvolda qolgan”, — deydi hokim o‘rinbosari.
Hokim o‘rinbosarining aytishicha, quruvchi tadbirkorga xarajatini qoplab olishi uchun bir nechta qurilish obyektlari berilgan.
“‘Dom’ uchun hojatxona qurib bering, deyishdi. Qurib berdim va belgilangan pulimni oldim. Yana bir inshootning tomini yopib berdim. Ammo 162 million so‘m pulim haligacha berilmadi-da. Shu obyektlardan qoplab olasiz, deyishgan. Qanday qilib 162 million so‘mni bulardan chiqarib olaman, shuni tushunmayapman”, — deydi quruvchi.
Aniqlanishicha, tumanning sobiq hokimi Asror Jo‘rayev quruvchi uy ta’mirini tugatgach, uni uyni o‘z nazoratiga olgan xususiy uy-joy mulkdorlari shirkati bilan shartnoma imzolatgan. Shirkat esa ayni kunda pulni to‘lab berolmaydi — tayinli mablag‘i yo‘q.
Quruvchi tadbirkor esa pulini olish umidida hokimiyatga qatnash bilan ovora, ammo natija yo‘q.
Izoh (0)